អតីតឯកអគ្គរដ្ឋទូតអឺរ៉ុប និងអ្នកការទូតជាន់ខ្ពស់ជាង ២០០នាក់ បានរិះគន់សហភាពអឺរ៉ុបដោយកំហឹង ចំពោះការខកខានមិនបានចាត់ «វិធានការសំខាន់ៗ» ដើម្បីដាក់សម្ពាធលើអ៊ីស្រាអែល ឲ្យបញ្ចប់សង្រ្គាមនៅតំបន់ហ្កាហ្សា។

បណ្តាប្រទេសលោកខាងលិច បានប្រឈមនឹងសម្ពាធកាន់តែកើនឡើង ក្នុងការចាត់វិធានការកាន់តែខ្លាំងប្រឆាំងនឹងអ៊ីស្រាអែល ខណៈដែលការសម្លាប់ជនស៊ីវិលប៉ាឡេស្ទីន នៅតែបន្តជារៀងរាល់ថ្ងៃ។

ជាពិសេស សហភាពអឺរ៉ុប កំពុងរងការរិះគន់យ៉ាងខ្លាំងចំពោះកិច្ចប្រឹងប្រែងក្នុងប្រកាន់ជំហរតឹងរ៉ឹងជាងមុន ដើម្បីបញ្ចប់សង្រ្គាមនេះ។

កាលពីខែមុន ប្លុកនេះ បានបរាជ័យក្នុងការយល់ព្រមលើការដាក់ទណ្ឌកម្មជាច្រើនប្រឆាំងនឹងអ៊ីស្រាអែល បើទោះបីជាមានការពិនិត្យឡើងវិញដែលរកឃើញថា ប្រទេសនេះ បានរំលោភលើកាតព្វកិច្ចសិទ្ធិមនុស្សរបស់ខ្លួន ក្រោមកិច្ចព្រមព្រៀងសមាគមមួយ ជាមួយសហភាពអឺរ៉ុបក៏ដោយ។

ប្រធានគោលនយោបាយការបរទេសអឺរ៉ុប លោកស្រី Kaja Kallas បាននិយាយថា វិធានការដាក់ទណ្ឌកម្មដែលបានស្នើឡើង កាលពីថ្ងៃទី ១៥ ខែកក្កដា ត្រូវបានផ្អាកវិញ បន្ទាប់ពីអ៊ីស្រាអែល បានយល់ព្រមអនុ ញ្ញាតឲ្យជំនួយបន្ថែមទៀត ហូរចូលទៅក្នុងតំបន់ហ្កាហ្សា។

នៅក្នុងលិខិតចំហមួយផ្ញើរជូនមេដឹកនាំសហភាពអឺរ៉ុប ដែលបានចេញផ្សាយកាលពីថ្ងៃអង្គារ អតីតឯកអគ្គរដ្ឋទូត និងបុគ្គលិកជាន់ខ្ពស់របស់សហភាពអឺរ៉ុបចំនួន ២០៩នាក់ រួមជាមួយនឹងអតីតឯកអគ្គរដ្ឋទូតមកពីរដ្ឋអឺរ៉ុប បានថ្កោលទោសចំពោះការខកខានរបស់ប្លុកនេះ មិនបានចាត់វិធានការ ដើម្បីដាក់សម្ពាធលើអ៊ីស្រាអែលឲ្យបញ្ឈប់សង្គ្រាមនៅតំន់ហ្កាហ្សា។