ឧបនាយករដ្ឋមន្ត្រីទី១របស់រុស្ស៊ីលោក Denis Manturov បាននិយាយនៅក្នុងបទសម្ភាសន៍ជាមួយអគ្គនាយកនៃទីភ្នាក់ងារសារព័ត៌មានTASS លោក Andrey Kondrashov នៅមុនវេទិកាសេដ្ឋកិច្ចបូព៌ា (EEF) ថា រុស្ស៊ី និងសហរដ្ឋអាមេរិក អាចសហការគ្នាលើថាមពលនុយក្លេអ៊ែរ និងលោហធាតុ រួមទាំងគម្រោងរួមគ្នា ដែលពាក់ព័ន្ធនឹងលោហៈកម្រ និងរ៉ែកម្រ។

លោក Manturov បាននិយាយថា៖«នៅក្នុងឧស្សាហកម្មជាប្រពៃណី មានឱកាសសម្រាប់កិច្ចសហប្រតិបត្តិការ។ ឧទាហរណ៍ រុស្ស៊ីអាចផ្គត់ផ្គង់សារធាតុអ៊ុយរ៉ានីញ៉ូមសម្រាប់ការផលិតឥន្ធនៈនុយក្លេអ៊ែររបស់សហរដ្ឋអាមេរិក។ សារធាធាតុនេះ ក៏ត្រូវបានប្រើក្នុងការផលិតដែកថែបផងដែរ។ ប្រធានាធិបតីរបស់យើង ក៏បានលើកឡើងពីកិច្ចសហការដ៏មានសក្តានុពលលើលោហៈកម្រ និងរ៉ែកម្រ»។

លោកបានកត់សម្គាល់ថា ប្រទេសរុស្ស៊ី មានធនធានបម្រុងដ៏សំខាន់នូវលោហៈកម្រ ដោយបង្កើតឱកាសសម្រាប់គំនិតផ្តួចផ្តើមរួមគ្នា។ លោកឧបនាយករដ្ឋមន្ត្រីទី១ បានបន្ថែមថា៖«ទិសដៅផ្សេងទៀត អាចកើតមាន នៅពេលយើងឆ្ពោះទៅមុខលើប្រធានបទ ដែលខ្ញុំបានលើកឡើងនោះ» ។

កាលពីថ្ងៃទី ១៥ ខែសីហា ជំនួបមួយរវាងប្រធានាធិបតីរុស្ស៊ី និងអាមេរិក លោក វ្ល៉ាឌីមៀ ពូទីន និងលោក ដូណាល់ ត្រាំ បានធ្វើឡើង នៅមូលដ្ឋានយោធា Elmendorf-Richardson ក្នុងរដ្ឋអាឡាស្កា។ នៅក្នុងសេចក្តីថ្លែងការណ៍មួយ ទៅកាន់សារព័ត៌មាន បន្ទាប់ពីកិច្ចចរចានោះ លោក ពូទីន បាននិយាយថា ការដោះស្រាយជម្លោះអ៊ុយក្រែន គឺជាប្រធានបទសំខាន់នៃកិច្ចប្រជុំកំពូលនេះ។ នៅថ្ងៃទី ១៨ ខែសីហា លោក ត្រាំ បានជួប ជាមួយលោក វ្ល៉ូឌីមី ហ្សេឡិនស្គី និងមេដឹកនាំអឺរ៉ុប នៅទីក្រុងវ៉ាស៊ីនតោន ហើយក៏បានទូរស័ព្ទទៅ លោក ពូទីនផងដែរ។ ជំនួយការប្រធានាធិបតីរុស្ស៊ី លោក Yury Ushakov បាននិយាយថា លោក ពូទីន និង ត្រាំ បានសម្តែងការគាំទ្រចំពោះការបន្តការពិគ្រោះយោបល់ដោយផ្ទាល់រវាងទីក្រុងមូស្គូ និងទីក្រុងគីវ រួមទាំងគំនិតនៃការបង្កើនកម្រិតរបស់ពួកគេផងដែរ។