​អឺរ៉ុប៖ អាល្លឺម៉ង់​កំពុងស្ថិត​នៅក្រោម​សម្ពាធ​កាន់តែខ្លាំង​ឡើង​ពី​សម្ព័ន្ធមិត្ត​អឺរ៉ុប ​ចំពោះ​ការបដិសេធ​យូរ​មកហើយ​របស់ខ្លួន​ក្នុងការ​ផ្គត់ផ្គង់​អាវុធ​ដល់​អ៊ុយ​ក្រែ​ន ដើម្បី​ជួយ​ប្រទេស​នេះ​ការពារ​ខ្លួន​ពី​ការវាយប្រហារ​របស់​រុស្ស៊ី​។ ​អង់គ្លេស​កាលពី​ថ្ងៃ​ចន្ទ​បាន​ដឹកជញ្ជូន​មី​ស៊ី​ល​ប្រឆាំង​រថក្រោះ​រយៈ​ចម្ងាយ​ខ្លី ​ទៅ​ឱ្យ​អ៊ុយ​ក្រែ​ន​ដោយ​ហោះហើរ​វាង​ដែនអាកាស​ប្រទេស​អាល្លឺម៉ង់​។

រដ្ឋមន្ត្រី​ក្រសួងការពារជាតិ​អង់គ្លេស Ben Wallace បាន​ផ្តល់​សញ្ញា​ដល់​សមាជិកសភា​ថា ជំនួយ​ផ្នែក​យោធា និង​ជំនួយ​សន្តិសុខ​បន្ថែមទំនងជា​កើត​ឡើង​ដោយសារ "​អាកប្បកិរិយា​ដ៏​គ្រោះថ្នាក់​កាន់​តែ​ខ្លាំង​" ​របស់​រុស្ស៊ី​នៅតាម​ព្រំដែន​របស់​ប្រទេស​អ៊ុយ​ក្រែ​ន ជាទី​ដែល​វិមានក្រឹម​ឡាំង​បាន​ប្រមូល​ផ្តុំ​កងទ័ព​ជាង ១០ម៉ឺន​នាក់​។​ ​លោក ​Wallace ​បាន​និយាយ​ថា​ មាន ​"​ហេតុផល​ត្រឹមត្រូវ និង​ពិតប្រាកដ​សម្រាប់​ការ​ព្រួយបារម្ភ​" ដែល​រុស្ស៊ី​កំពុង​រៀបចំ​ផែនការ​ឈ្លានពាន​។ មន្ត្រី​រុស្ស៊ី​បាន​បដិសេធ​ថា ​ពួកគេ​មិន​មាន​ផែនការ​បែប​នេះ​ទេ ប៉ុន្តែ​រដ្ឋមន្ត្រីការបរទេស​អាមេរិក​លោក ​Antony Blinken បាន​ព្រមាន​កាលពី​ថ្ងៃ​ពុធ​មុន​ជួប​ពិភាក្សា​ជាមួយ​ប្រធានាធិបតី​អ៊ុយ​ក្រែ​ន​លោក Volodymyr Zelensky ថា "​អារម្មណ៍​នៃ​ការ​គំរាម​កំហែង​ដល់​អ៊ុយ​ក្រែ​ន​គឺ​មិន​ធ្លាប់​មាន​ពី​មុន​មក​"។​

​អ៊ុយ​ក្រែ​ន​កាន់តែ​តានតឹង​ជាមួយ​អាល្លឺម៉ង់​ចំពោះ​បញ្ហា​ការ​ផ្គត់ផ្គង់​ខាង​យោធា​។ រដ្ឋមន្ត្រី​ការពារ​ជាតិអ៊ុយ​ក្រែ​នលោក Oleksiy Reznikov បាន​ត្អូញត្អែរ​កាលពី​ខែ​មុន​ថា ទីក្រុង​ប៊ែ​រ​ឡាំង​បាន​បោះឆ្នោត​វេតូ​ការ​ទិញ​អាវុធ​ប្រឆាំង​យាន​ដ្រូ​ន និង​ប្រព័ន្ធ​ប្រឆាំង​ការ​លប​បាញ់​ប្រហារ sniper ពី​ទីភ្នាក់ងារ​គាំទ្រ និង​លទ្ធកម្ម​របស់​អង្គការ​ណា​តូ ដោយ​ហៅ​សកម្មភាព​នេះ​ថា "​អយុត្តិធម៌​បំផុត"​៕

អត្ថបទ៖ សុខមាន