រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយនៅក្នុងបទសម្ភាសន៍ជាមួយសារព័ត៌មាន Asharq Al Awsat ថា ទីក្រុងតេអេរ៉ង់ ត្រៀមខ្លួនជាស្រេច ដើម្បីបន្តកិច្ចចរចាដោយប្រយោលជាមួយទីក្រុងវ៉ាស៊ីនតោន លើបញ្ហានុយក្លេអ៊ែរ ប្រសិនបើខ្លួនមានទំនុកចិត្តថា សហរដ្ឋអាមេរិក និងអ៊ីស្រាអែល នឹងមិនវាយប្រហារលើប្រទេសនេះទៀតទេ។

ប្រមុខការទូតរូបនេះ បាននិយាយថា៖ «យើងត្រៀមខ្លួនជាស្រេច ដើម្បីធ្វើកិច្ចពិភាក្សាដោយប្រយោលជាមួយសហរដ្ឋអាមេរិក ប្រសិនបើជនជាតិអាមេរិក ធានាយើងថា ពួកគេនឹងមិនចាប់ផ្តើមសកម្មភាពយោធាណាមួយ ក្នុងអំឡុងពេលកិច្ចពិភាក្សាទាំងនេះ។ យើងត្រូវតែទទួលបានការធានាថា ការចរចាទាំងនេះ នឹងមានភាពស្មោះត្រង់ និងយុត្តិធម៌ ដែលឆ្លើយតបនឹងផលប្រយោជន៍របស់ភាគីទាំងពីរ ហើយផ្អែកលើផលប្រយោជន៍ទៅវិញទៅមក»។

យោងតាមលោករដ្ឋមន្ត្រី ការវាយប្រហាររបស់អាមេរិកលើទីតាំងនុយក្លេអ៊ែរនៅក្នុងទីក្រុង Fordow, Natanz និង Isfahan មិនប៉ះពាល់ដល់ជំហររបស់អ៊ីរ៉ង់ទេ។ ប្រទេសនេះ បន្តការពារសិទ្ធិរបស់ខ្លួន ក្នុងការចម្រាញ់សារធាតុអ៊ុយរ៉ានីញ៉ូម នៅក្នុងព្រំដែនរបស់ខ្លួន។ លោក Araghchi បន្ថែមថា៖«ការចរចា បានដំណើរការពេញទំហឹង នៅពេលដែលអ៊ីស្រាអែល បានវាយប្រហារមកលើពួកយើង បន្ទាប់មកអាមេរិកក៏ បានចូលរួមក្នុងជម្លោះនោះ។ ដូច្នេះហើយ ប្រសិនបើការចរចាថ្មី កើតឡើង ពួកគេប្រាកដជានឹងមិនធ្វើដូច ពីមុនទៀតទេ។