ប្រធានាធិបតីប្រេស៊ីលលោក Luiz Inacio Lula da Silva បានរិះគន់យ៉ាងចាស់ដៃចំពោះបណ្តាប្រទេសនៅអឺរ៉ុប ជុំវិញការអនុម័តលើការចំណាយយោធាចំនួន ៨០០ពាន់លានអឺរ៉ូ ជំនួសឲ្យការបញ្ជូនមូលនិធិទាំងនោះ ឆ្ពោះទៅរកការប្រយុទ្ធប្រឆាំងនឹងភាពស្រេកឃ្លានជាសកល។

លោក Lula បាននិយាយថា៖«សហភាពអឺរ៉ុប បានឯកភាពគ្នាលើការចំណាយប្រាក់ចំនួន ៨០០ ពាន់លានអឺរ៉ូសម្រាប់ការបំពាន់អាវុធឡើងវិញដល់ប្រទេសទាំងអស់ នៅក្នុងសហគមន៍ ខណៈដែលយើង ដែលជា[ប្រទេសកំពុងអភិវឌ្ឍន៍] នឹងប្រើប្រាស់ប្រាក់នេះ ដើម្បីបញ្ឈប់ភាពអត់ឃ្លាន ឬអភិរក្សព្រៃឈើនោះ»។



លោកក៏បានបញ្ជាក់ជាថ្មីនូវទស្សនៈរបស់ខ្លួនថា អង្គការសហប្រជាជាតិ កំពុងបរាជ័យក្នុងបេសកកម្មស្នូលរបស់ខ្លួន ក្នុងការទប់ស្កាត់សង្គ្រាម។ ដោយចង្អុលទៅជម្លោះហ្កាហ្សា ជាភ័ស្តុតាងនៃវិបត្តិរបស់អង្គការនេះ លោក Lula បានប្រកាសថា៖«យើងបាននិយាយជាយូរមកហើយថា ការផ្លាស់ប្តូរ គឺចាំបាច់នៅក្នុងរចនាសម្ព័ន្ធរបស់អង្គការសហប្រជាជាតិ ដើម្បីឲ្យមាននរណាម្នាក់ដែលអាចជួយបញ្ឈប់ការប្រល័យពូជសាសន៍នេះ បញ្ចប់ និងទប់ស្កាត់សង្គ្រាម។ នោះហើយគឺជាមូលហេតុដែលយើងនឹងបន្តប្រយុទ្ធ ដើម្បីការកំណត់ឡើងវិញនៃអភិបាលកិច្ចសកល»។

នេះ គឺមិនមែនជាលើកទី១ទេ ដែលលោកប្រធានាធិបតីប្រេស៊ីល បាននិយាយប្រឆាំងនឹងការចំណាយយោធានៅអឺរ៉ុប។ កាលពីខែឧសភាកន្លងទៅ បន្ទាប់ពីដំណើរទស្សនកិច្ចរបស់លោកទៅកាន់ប្រទេសរុស្ស៊ី លោកបានពិពណ៌នាអំពីល្បឿននៃការបំពាក់អាវុធឡើងដោយរដ្ឋសហភាពអឺរ៉ុប និងសម្ព័ន្ធមិត្តរបស់ពួកគេ ជាពិសេសប្រទេសជប៉ុនថា ជាវិធានការ«ខ្វះការពិចារណា»។