អនុរដ្ឋមន្ត្រីថាមពលទី១លោក Pavel Sorokin បាននិយាយថា ប្រទេសរុស្សី គ្រោងនឹងឈានដល់ការ ផលិតប្រេងចំនួន ៥៤០លានតោន ក្នុងពេលដ៏ខ្លីខាងមុខនេះ ដោយបន្ថែមថា ប្រទេសនេះ មានធនធាន ដើម្បីធ្វើកិច្ចការនេះបាន។

លោកបាននិយាយថា៖«យើងមានគម្រោងបង្កើនការផលិតប្រេងដល់កម្រិតរហូតដល់ ៥៤០លានតោន នាពេលខាងមុខ ទាំងនៅក្នុងក្របខ័ណ្ឌនៃយុទ្ធសាស្រ្តថាមពលរបស់យើង (រហូតដល់ឆ្នាំ ២០៥០) និងក្នុងក្របខ័ណ្ឌនៃកិច្ចសហប្រតិបត្តិការជាមួយដៃគូ OPEC+ របស់យើង។

លោក Sorokin បានបញ្ជាក់ថា ទុនបម្រុងប្រេងរបស់រុស្ស៊ីបច្ចុប្បន្នមានប្រហែល ៣១ ពាន់លានតោន ដែលក្នុងនោះ មានតែពាក់កណ្តាលប៉ុណ្ណោះ ដែលទទួលបានផលចំណេញ ដោយបានបន្ថែមថា ប្រទេសនេះ ចាំបាច់ត្រូវខិតខំប្រឹងប្រែងទាំងក្នុងវិស័យបច្ចេកវិទ្យា និងពន្ធដារ ដើម្បីបង្កើនបរិមាណទុនបំរុងដែលមានផលចំណេញ។



យោងតាមយុទ្ធសាស្ត្រថាមពល រហូតដល់ឆ្នាំ ២០៥០ ប្រទេសរុស្ស៊ី នឹងឈានដល់បរិមាណផលិតកម្មប្រេងចំនួន ៥៤០លានតោន នៅឆ្នាំ ២០៣០ ជាមួយនឹងទិន្នផលនឹងនៅតែស្ថិតក្នុងកម្រិតនេះ រហូតដល់ឆ្នាំ ២០៥០។ ក្នុងពេលជាមួយគ្នានេះ ក្រសួងអភិវឌ្ឍន៍សេដ្ឋកិច្ច រំពឹងថា នឹងឈានដល់កម្រិតផលិតកម្មនេះ ពីរឆ្នាំមុនពេលកំណត់ គឺនៅឆ្នាំ ២០២៨។