តាមរយៈលិខិតមួយច្បាប់ផ្ញើទៅកាន់មេដឹកនាំអ៊ីស្រាអែលដែលត្រូវបានចេញផ្សាយជាសាធារណៈ កាលពីថ្ងៃអង្គារ (ទី២៦ ខែសីហា) លោកប្រធានាធិបតី Emmanuel Macron បានច្រានចោលយ៉ាងដាច់អហង្ការ ចំពោះការរិះគន់ នាពេលថ្មីៗនេះរបស់លោក Benjamin Netanyahu ជុំវិញការកើនឡើងនូវសកម្មភាពប្រឆាំងជនជាតិជ្វីហ្វ នៅក្នុងប្រទេសបារាំង ហើយបានព្រមានថា បញ្ហានេះមិនគួរត្រូវបានយកមក «ប្រើជាអាវុធ» នោះឡើយ។

ជម្លោះពាក្យសម្ដីបានចាប់ផ្ដើមផ្ទុះឡើង ជុំវិញការកើនឡើងនូវអំពើប្រឆាំងជនជាតិជ្វីហ្វ និងឧក្រិដ្ឋកម្មស្អប់ខ្ពើម នៅក្នុងប្រទេសបារាំង ខណៈដែលភាពតានតឹងអន្តរជាតិ ក៏ឡើងកម្ដៅខ្លាំងឡើងៗផងដែរ ជុំវិញជម្លោះ នៅតំបន់ហ្កាហ្សា។

នៅក្នុងលិខិតមួយដែលត្រូវបានចុះផ្សាយដោយសារព័ត៌មានជាច្រើន លោក Macron បានសរសេរទៅកាន់លោក Netanyahu ថា៖ «ការចោទប្រកាន់អំពីភាពអសកម្ម នៅចំពោះមុខទង្វើបង្កទុក្ខទោស ដែលយើងកំពុងប្រយុទ្ធជាមួយ តាមមធ្យោបាយគ្រប់យ៉ាង នៅក្នុងសិទ្ធិអំណាចរបស់យើង គឺមិនអាចទទួលយកបានឡើយ ហើយជាការប្រមាថដល់ប្រទេសបារាំងទាំងមូល»។

មេដឹកនាំបារាំងរូបនេះបានបន្ថែមថា៖ «យុទ្ធការប្រយុទ្ធនឹងសកម្មភាពប្រឆាំងជនជាតិជ្វីហ្វ មិនត្រូវយកមកប្រើប្រាស់ជាឧបករណ៍នយោបាយឡើយ ហើយក៏មិនត្រូវបង្កឲ្យមានជម្លោះ រវាងអ៊ីស្រាអែល និងបារាំងនោះដែរ»។

គួរបញ្ជាក់ថា នៅក្នុងលិខិតមួយ កាលពីពាក់កណ្តាលខែសីហា លោក Netanyahu បានត្អូញត្អែរថា ការសន្យារបស់លោក Macron ដែលថា ប្រទេសបារាំងនឹងទទួលស្គាល់រដ្ឋប៉ាឡេស្ទីន កំពុងជំរុញឲ្យមានសកម្មភាពប្រឆាំងជនជាតិជ្វីហ្វ។

សម្រាប់អ៊ីស្រាអែល ប្រទេសនេះបាននិងកំពុងស្ថិតនៅក្រោមសម្ពាធកាន់តែខ្លាំងឡើងៗឲ្យបញ្ចប់យុទ្ធនាការរបស់ខ្លួន នៅតំបន់ហ្កាហ្សា ជាកន្លែងដែលសង្រ្គាមបានបង្កឲ្យមានវិបត្តិមនុស្សធម៌ និងការបំផ្លិចបំផ្លាញភាគច្រើនលើដែនដីនេះ និងឲ្យនាំយកចំណាប់ថ្នូរអ៊ីស្រាអែលដែលជាប់ឃុំខ្លួននៅទីនោះត្រលប់មកផ្ទះសម្បែងរបស់ពួកគេវិញ៕