ប្រទេសចិន នៅថ្ងៃពុធ (ទី២៧ ខែសីហា) នេះ បានលើកឡើងថា កោះតៃវ៉ាន់កំពុង «ប្រមាថ» ដល់ការលះបង់របស់អ្នកពលី អំឡុងពេលប្រយុទ្ធជាមួយជប៉ុន ក្នុងសង្គ្រាមលោកលើកទី២ បន្ទាប់ពីកោះនេះបានបដិសេធតួនាទីសំខាន់របស់បក្សកុម្មុយនីស្ត ហើយបានថ្កោលទោសការអំពាវនាវរបស់ទីក្រុងតៃប៉ិដែលឲ្យកោះតៃវ៉ាន់នៅឆ្ងាយពីពិធីរំលឹកខួបព្រឹត្តិការណ៍នោះរបស់ទីក្រុងប៉េកាំង។

នាឆ្នាំនេះ ខួបលើកទី៨០ នៃការបញ្ចប់សង្រ្គាមលោក ដែលជាការបង្ហាញពីព្រឹត្តិការណ៍កើតឡើងនៅមុននោះ ក្នុងប្រទេសចិន អំពីការចូលដណ្តើមគ្រប់គ្រងលើភាគខាងកើតនៃតំបន់ម៉ាន់ជូរី ក្នុងឆ្នាំ១៩៣១ ពីសំណាក់ប្រទេសជប៉ុន និងការលុកលុយជាបន្តបន្ទាប់របស់ទីក្រុងតូក្យូលើផ្នែកផ្សេងទៀតរបស់ចិន ក្នុងឆ្នាំ១៩៣៧ បានបង្កឲ្យមានការនិទានប្រវត្តិរឿងរ៉ាវជូរចត់ រវាងទីក្រុងប៉េកាំង និងតៃប៉ិ។

កោះតៃវ៉ាន់លើកឡើងថា បក្សកុម្មុយនីស្តដែលកំពុងកាន់អំណាចរបស់ចិន កំពុងក្លែងបន្លំការអះអាង សម្រាប់ការដឹកនាំការប្រយុទ្ធ នៅពេលដែលភាគច្រើននៃការប្រយុទ្ធត្រូវបានធ្វើឡើងដោយកងកម្លាំងសាធារណរដ្ឋចិន ដែលរដ្ឋាភិបាលរបស់ពួកគេ បន្ទាប់មកបានភៀសខ្លួនទៅកាន់កោះនេះ ក្នុងឆ្នាំ១៩៤៩ បន្ទាប់ពីបានចាញ់សង្គ្រាមស៊ីវិល។ កោះតៃវ៉ាន់ដែលគ្រប់គ្រងខ្លួនឯងដោយប្រជាធិបតេយ្យ បន្តរក្សាឈ្មោះសាធារណរដ្ឋចិនជាឈ្មោះផ្លូវការរបស់ខ្លួន។

នៅឯរដ្ឋធានីប៉េកាំង លោកស្រី Zhu Fenglian អ្នកនាំពាក្យការិយាល័យទទួលបន្ទុកកិច្ចការកោះតៃវ៉ាន់របស់ប្រទេសចិន បាននិយាយថា កោះតៃវ៉ាន់កំពុង «បង្កាច់បង្ខូច និងលុបបំបាត់» តួនាទីរបស់បក្សកុម្មុយនីស្ត ដែលជា «ឆ្អឹងខ្នង» របស់ប្រទេស ក្នុងការប្រយុទ្ធប្រឆាំងនឹងប្រទេសជប៉ុន។ លោកស្រី Zhu បានប្រាប់សន្និសីទសារព័ត៌មានមួយថា៖ «នេះគឺជាការប្រមាថយ៉ាងធ្ងន់ធ្ងរ ចំពោះទុក្ករបុគ្គល និងវីរបុរសដ៏ស្មោះត្រង់ទាំងអស់ ហើយនេះជាការក្បត់ដោយឥតអៀនខ្មាស ចំពោះប្រទេសចិនទាំងមូល»។

កោះតៃវ៉ាន់បានជំរុញអ្នកកោះនេះកុំឲ្យចូលរួមក្បួនដង្ហែរយោធាទ្រង់ទ្រាយធំរបស់ទីក្រុងប៉េកាំង នៅសប្តាហ៍ក្រោយ សម្រាប់ព្រឹត្តិការណ៍ប្រារព្ធខួបនេះ ហើយគំរាមដាក់ទណ្ឌកម្ម ដូចជាការផ្អាកផ្ដល់ប្រាក់សោធននិវត្តន៍ សម្រាប់អតីតមន្ត្រីការពារដែនកោះជាន់ខ្ពស់ ចារកម្ម ឬមន្ត្រីការទូត ដែលមិនគោរពតាម៕