ទិដ្ឋភាពនៃសកម្មភាពសេដ្ឋកិច្ចដ៏ច្របូកច្របល់ត្រូវបានគេមើលឃើញនៅទីផ្សារលក់ដុំមួយកន្លែងក្នុងទីក្រុងដែលី ប្រទេសឥណ្ឌា ខណៈការដំឡើងពន្ធទ្វេរដងរបស់លោកប្រធានាធិបតីសហរដ្ឋអាមេរិក Donald Trump លើទំនិញពីប្រទេសឥណ្ឌាឡើងដល់៥០% បានចូលជាធរមានតាមផែនការនៅថ្ងៃពុធ ទី២៧ ខែសីហានេះ ដែលបានបង្កើនភាពតានតឹងរវាងប្រទេសលទ្ធិប្រជាធិបតេយ្យធំបំផុតទាំងពីរ និងជាដៃគូយុទ្ធសាស្ត្រ។

ទណ្ឌកម្មដំឡើងពន្ធ២៥%បន្ថែម ត្រូវបានដាក់ដោយសារតែការទិញប្រេងរបស់ប្រទេសឥណ្ឌាពីប្រទេសរុស្ស៊ីដោយបានបន្ថែមទៅលើពន្ធ២៥%កាលពីពេលមុនរបស់លោកTrump លើផលិតផលជាច្រើនពីប្រទេសឥណ្ឌា។ វាធ្វើឲ្យពន្ធសរុបឡើងរហូតដល់៥០% សម្រាប់ទំនិញដូចជាសម្លៀកបំពាក់ ត្បូង និងគ្រឿងអលង្ការ ស្បែកជើង ទំនិញកីឡា គ្រឿងសង្ហារឹម និងគ្រឿងគីមីផ្សេងទៀត ក្នុងចំណោមទំនិញដែលដាក់ពន្ធខ្ពស់បំផុតដោយសហរដ្ឋអាមេរិក និងស្មើជាមួយប្រទេសប្រេស៊ីល។

មន្ត្រីក្រសួងពាណិជ្ជកម្មឥណ្ឌាម្នាក់ បាននិយាយថា ក្រុមហ៊ុននាំចេញដែលត្រូវរងផលប៉ះពាល់ដោយការដំឡើងពន្ធនឹងទទួលបានជំនួយហិរញ្ញវត្ថុ និងត្រូវបានលើកទឹកចិត្តដើម្បីធ្វើពិពិធកម្មទៅកាន់ទីផ្សារនានាដូចជាប្រទេសចិន អាមេរិកឡាទីន និងនៅមជ្ឈឹមបូព៌ា។