​បាល់ទាត់៖ ​ក្រុម​ជើងឯក Copa dey Rey ៣១សម័យ FC Barcelona បាន​ធ្លាក់​ចេញ​ត្រឹម​វគ្គ ១៦ក្រុម​ចុង​ក្រោយ​បន្ទាប់ពី​ចាញ់ Athletic Bilbao ក្នុង​ម៉ោង​បន្ថែម​។ ​Iker Muniain ជា​អ្នក​បើក​ការ​នាំ​មុខ​ឱ្យ Bilbao តាំងពី​នាទី​ទី២ មុន​ពេល​ដែល Ferran Torres ស៊ុត​តាម​ស្មើ​វិញ​នៅ​នាទី​ទី២០ ដែល​ជា​គ្រាប់​ដំបូង​របស់​គេ​តាំងពី​ផ្ទេរ​ពី Manchester City​។​

​​ការប្រកួត​ជិត​ដល់​ទី​បញ្ចប់​ទៅ​ហើយ Bilbao ក៏​រក​គ្រាប់​នាំមុខ​បាន​ម្តង​ទៀត​ដោយ Inigo Martinez នាទី​ទី៨៦ តែ​មិន​ចប់​ត្រឹមនេះ Barcelona ក៏​តាម​ស្មើ​នៅ​នាទី​ទី៩០+៣ ដោយ Pedri​។ ​ឈាន​ដល់​ម៉ោង​បន្ថែម ១៥នាទី​ពីរ​ដង Iker Muniain ដដែល​ក៏​រក​បាន​គ្រាប់​ទី​ពីរ​របស់​ខ្លួន​នៅ​នាទី​ទី​១០៥ ដែល​ជា​គ្រាប់​ជ័យជំនះ​សំរាប់ Athletic Bilbao​។ ​Barcelona ដែល​កំពុង​ឈរ​លេខ ៦ នៅ La Liga តាម​ពីក្រោយ​ក្រុម​លេខ ១ Real Madrid ដល់​ទៅ ១៧​ពិន្ទុ​នោះ​នៅ​សល់​តែ​ពាន​មួយទៀត​ទេ​ក្នុង​ដៃ​គឺ UEFA Europa League​។

មួយគូ​ទៀត​យប់មិញ Real Madrid យកឈ្នះ​នៅ​ទឹកដី Elche ២-១ ឡើង​វគ្គ ៨ក្រុម​ចុងក្រោយ​។ ការ​ប្រកួត​នេះ​ក៏​អូសបន្លាយ​ដល់​ម៉ោង​បន្ថែម​ដែរ​បន្ទាប់ពី​ស្មើគ្នា ០-០ ដល់​ចប់ ៩០នាទី​។ ក្នុង​ម៉ោង​បន្ថែម​នោះ​ខ្សែការពារ​ប្រេ​ស៊ី​ល Marcelo ទទួលបាន​កាត​ក្រហម​នៅ​នាទី​ទី១០២ មុន​ពេលដែល​កីឡាករបម្រុង Gonzalo Verdu បើក​ការ​នាំមុខ​ឱ្យ Elche​។ ​គ្នា​តិចជាង​ក៏ពិតមែន​ក្រុម​របស់លោក Carlo Ancelotti ក៏​វាយបក​ពីក្រោយ​បាន​ពីរ​គ្រាប់​មកវិញ​ដោយ Isco នាទី​ទី១០៨ និង Eden Hazard នាទី​ទី១១៥ មុនពេល​ដែល Elche បាត់បង់​កីឡាករ​ម្នាក់​ដែរ​នៅ​នាទី​ទី១២០ ដោយ Pere Milla ទទួលបាន​កាត​លឿង​ទី២​។ ​ក្រុម​ទាំង ៨ ឡើង​វគ្គ​បន្ទាប់​រកឃើញ​អស់ហើយ​រង់ចាំតែ​ការចាប់​ឆ្នោត​នៅថ្ងៃនេះ​៕

​អត្ថបទ​៖​នាង សុភា​វុ​ធ