មន្ត្រីរបស់ក្រុមតាលីបង់មួយរូប បានប្រាប់ឲ្យដឹងថា រថយន្តក្រុងដឹកអ្នកដំណើរ ១គ្រឿង បានក្រឡាប់នៅក្នុងរដ្ឋធានីរបស់ប្រទេសអាហ្វហ្គានីស្ថាន នាព្រឹកថ្ងៃពុធ (ទី២៧ ខែសីហា) នេះ ដោយបានបណ្ដាលឲ្យមនុស្សយ៉ាងហោចណាស់ ២៥នាក់បាត់បង់ជីវិត។

ឧបទ្ទវហេតុនោះបានកើតឡើងនាពេលព្រឹកព្រលឹម នៅក្នុងតំបន់ Arghandi នៃទីក្រុង Kabul។ រថយន្តក្រុងនេះធ្វើដំណើរពីភាគខាងត្បូងអាហ្វហ្គានីស្ថាន ដោយដឹកអ្នកដំណើរមកពីខេត្ត Helmand និងទីក្រុង Kandahar។

អ្នកនាំពាក្យក្រសួងមហាផ្ទៃ លោក Abdul Mateen Qani បាននិយាយថា ការបើកបរដោយមិនប្រុងប្រយ័ត្ន បានបណ្តាលឲ្យកើតឧបទ្ទវហេតុនេះ ដែលក៏មានមនុស្ស ២៧នាក់ផ្សេងទៀតរងរបួសផងដែរ។

គ្រោះថ្នាក់នេះកើតឡើងតិចជាងមួយសប្តាហ៍ បន្ទាប់ពីមានឧបទ្ទវហេតុររថយន្តក្រុងស្រដៀងគ្នានេះដែលបានឆក់យកជីវិតមនុស្សប្រហែល ៨០នាក់ នៅក្នុងខេត្ត Herat ភាគខាងលិច៕