​បាល់ទាត់៖ ​ហង្ស​ក្រហម Liverpool បាន​ឈានឡើង​វគ្គ​ផ្ដាច់ព្រ័ត្រ​នៅ​កីឡដ្ឋាន Wembley ជា​លើក​ដំបូង​ក្នុង​រយៈពេល ៦ឆ្នាំបន្ទាប់ពី Diogo Jota រកបាន​ពីរ​គ្រាប់​ម្នាក់ឯង​យកឈ្នះ​កាំភ្លើង​ធំ Arsenal នៅ​កីឡដ្ឋាន Emirate​។​

​​តំបន់​ប្រយុទ្ធ​ខាងលើ​របស់ Liverpool មិនមាន​វត្តមាន Mohamed Salah និង Sadio Mane ឡើយ​ដោយ​អ្នក​ទាំង២ ​ជាប់​ភារកិច្ច​ជាមួយ​ក្រុម​ជំរើសជាតិ​នៅ​ព្រឹត្តិការណ៍​បាល់ទាត់​ទ្វីបអាហ្វ្រិក​។ ​​Arsenal ដែល​ជើងឯក​ទី១ នៅ​ទឹកដី Liverpool ស្មើគ្នា ០-០ នោះក៏​ចាប់ផ្តើម​បានល្អ​ដែរ​តែ​គ្មាន​សំណាង​ដូចជា​បាល់ Freekick របស់ Alexander Lacazette បុក​របារ​ទី មុនពេល Diogo Jota បើក​ការ​នាំមុខ​នៅ​នាទី​ទី១៩ និង​គ្រាប់​ទី​ពីរ​ទៀត​នៅ​នាទី​ទី៧៧ ក្នុង​វគ្គ​ទី២​។

​​គិត​មកដល់ពេលនេះ​តាំងពី​ផ្លាស់​ពី Wolverhampton រដូវ​កាល​មុន​ក្នុងតម្លៃ ៤៥លាន​ផោន Diogo Jota ស៊ុត​បញ្ចូល​ទី​បាន​សរុប ២៧គ្រាប់​ហើយ​ក្នុងការ​បង្ហាញខ្លួន ៥៧ប្រកួត​បូករួម​ទាំង ១៤គ្រាប់​រដូវ​កាល​នេះ​។ ​វគ្គ​ផ្តាច់ព្រ័ត្រ Carabao Cup នឹងធ្វើ​ឡើង​នៅ​ថ្ងៃទី២៧ ខែកុម្ភៈ​ខាងមុខ​រវាង Chelsea និង Liverpool នៅ​កីឡដ្ឋាន Wembley ទីក្រុង​ឡុង​ដ៍​៕

​អត្ថបទ​៖​នាង សុភា​វុ​ធ