ក្រសួងហិរញ្ញវត្ថុឥណ្ឌា បានលើកឡើងដោយក្ដីបារម្ភនៅក្នុងរបាយការណ៍ត្រួតពិនិត្យសេដ្ឋកិច្ចប្រចាំខែនៃខែកក្កដារបស់ខ្លួន ដែលចេញផ្សាយកាលពីថ្ងៃពុធ (២៧ សីហា) ថា ផលប៉ះពាល់ភ្លាមៗនៃពន្ធគយដ៏ខ្ពស់របស់សហរដ្ឋអាមេរិក លើការនាំចេញឥណ្ឌា ហាក់ដូចជានៅមានកម្រិត ប៉ុន្តែផលប៉ះពាល់ធ្ងន់ធ្ងរលើសេដ្ឋកិច្ចនៅពេលខាងមុខ បង្កឱ្យមានបញ្ហាប្រឈមដ៏ធំ ដែលត្រូវតែដោះស្រាយឱ្យបានត្រឹមត្រូវ។

របាយការណ៍របស់ក្រសួងហិរញ្ញវត្ថុនោះនិយាយថា ការចរចាពាណិជ្ជកម្មរវាងឥណ្ឌា និងអាមេរិក ដែលកំពុងបន្ត "នឹងស្ថិតក្នុងគ្រាសំខាន់ណាស់"។ ឥណ្ឌាកំពុងធ្វើយុទ្ធសាស្ត្រពាណិជ្ជកម្មចម្រុះ ដែលរួមមានកិច្ចព្រមព្រៀងពាណិជ្ជកម្មថ្មីៗរបស់ខ្លួនជាមួយអង់គ្លេស និងប្រទេសអឺរ៉ុបមួយចំនួន។ ទីក្រុងញូវដែលី ក៏មានកិច្ចពិភាក្សាជាបន្តបន្ទាប់ ជាមួយនូវែលសេឡង់ និងសហភាពអឺរ៉ុប ក្នុងចំណោមប្រទេសដទៃទៀត ដើម្បីរក្សានិរន្តរភាព "ដំណើរការពាណិជ្ជកម្មដែលមានភាពធន់" របស់ខ្លួន។

យ៉ាងណាក៏ដោយ "គំនិតផ្តួចផ្តើមទាំងនេះនឹងត្រូវការពេលវេលាដើម្បីបង្ហាញលទ្ធផល ហើយប្រហែលជាមិនអាចដោះស្រាយបានពេញលេញនូវកង្វះខាតការនាំចេញទៅកាន់សហរដ្ឋអាមេរិកឡើយ ដែលអាចកើតឡើងប្រសិនបើអត្រាពន្ធនាពេលបច្ចុប្បន្នលើឥណ្ឌានៅតែបន្ត"។

ការដំឡើងពន្ធទ្វេដងរបស់លោកប្រធានាធិបតីអាមេរិក Donald Trump លើទំនិញពីឥណ្ឌា ដល់ទៅ ៥០% បានចូលជាធរមានដូចដែលគ្រោងទុកកាលពីថ្ងៃពុធ ដោយប៉ះពាល់យ៉ាងធ្ងន់ធ្ងរដល់ទំនាក់ទំនងរវាងប្រទេសដែលជាដៃគូយុទ្ធសាស្ត្រទាំងពីរ៕