ភ្នំពេញ៖ វិស័យឯកជន រំពឹងថា កម្ពុជានឹងអាចស្រូបយកកំណើនភ្ញៀវទេសចរណ៍ឡើងវិញ ខណៈដែលវេទិកាទេសចរណ៍អាស៊ានឆ្នាំ២០២២នេះ បានបើកផ្លូវជាច្រើន ស្របពេលកម្ពុជាគឺជាប្រទេសមួយ ដែលមានសក្តានុពលលើវិស័យទេសចរណ៍គ្រប់បែបយ៉ាង។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា ថ្លែងលើកឡើងក្នុងកិច្ច​សម្ភាសន៍​ជាមួយភ្នាក់ងារអ្នកយកព័ត៌មាន ស្តីពីវិស័យទេសចរណ៍នៅកម្ពុជា នៅថ្ងៃទី ២១ ខែ មករាឆ្នាំ២០២២នេះថា វេទិកាទេសចរណ៍អាស៊ាន ឆ្នាំ២០២២ ដែលបានប្រារព្វធ្វើឡើងនៅកម្ពុជា បាននាំមកនូវកិច្ចសន្ទនាជាច្រើនរវាងវិស័យរដ្ឋ ​និងវិស័យឯកជន​ ជាពិសេសលើកិច្ចសហប្រតិបត្តិ ការលើ​វិស័យទេសចរណ៍, ការផ្សព្វផ្សាយភាសាររួមគ្នា, ការផ្លាស់ប្តូរទស្សនកិច្ចសិក្សា, ការបង្ហាញ​ពីសក្តានុពល​ថ្មីៗរបស់កម្ពុជាបន្ថែម និងការជម្រុញឲ្យមានការបណ្តុះបណ្តាលលើវិស័យទេស​ចរណ៍​ជាដើម។ ទាំងអស់នេះ គឺជាជម្រុញដោះស្រាយនិងការផ្សារភ្ជាប់កាន់តែ​ជិតស្និទ្ធ រវាងប្រទេសទាំង​អស់​នៅក្នុងអាស៊ាន ដើម្បីជម្រុញរួមគ្នាស្តារឡើងវិញ ដើម្បីសេដ្ឋកិច្ច-សង្គម ។

លោកស្រី បន្តថា តាមរយៈនៃកិច្ចសហការនេះ​ កម្ពុជានឹងទទួលបានអត្ថប្រយោជន៍ជាច្រើន និង​ជាការបើកផ្លូវបន្ថែមទៀត​ ជាពិសេសលើវិស័យទេសចរណ៍ និងស្របពេលកម្ពុជាបានគ្រប់គ្រង និងទប់ស្កាត់នៃការរីករាលដាលជំងឺកូវីដ-១៩​ បានល្អប្រសើរផងដែរនោះ កម្ពុជារំពឹងថា​អាចស្រូបយកកំណើនភ្ញៀវទេសចរណ៍កាន់តែច្រើនបន្ថែមទៀតនៅក្នុងឆ្នាំនេះ នឹងឆ្នាំបន្តបន្ទាប់។

សូមបញ្ជាក់ថា៖ ព្រិត្តិការណ៍នៃវេទិកាទេសចរសណ៍អាស៊ានឆ្នាំ ២០២២ ដែលរៀបចំឡើងនៅកម្ពុជា បាននាំ​មកនូវផ្កែផ្កាជាច្រើនដូចជា ការជម្រុញ​តភ្ជាប់ជើងហោះហើរត្រង់ ​រវាងកម្ពុជា​ និងឥណ្ធូនេស៊ី, ការរួមគ្នាប្រកាសបើកទេសចរណ៍អាស៊ាន​ឡើងវិញ ​ដោយចេញពីខេត្តព្រះសីហនុ, ការប្រកួតប្រជែង​ទីក្រុងស្អាត និងការដាក់ផែនការបន្តជាមួយគ្នា ក្នុងការស្វែងមធ្យោបាយប្រើប្រាស់បច្ចេកវិទ្យា​ឌីជីថល​ឲ្យកាន់តែប្រសើរសម្រាប់តាមបរិវត្តកម្មនៃវិស័យទេសចរណ៍អាស៊ាន និងបន្តពង្រឹងកិច្ច​សហប្រតិបត្តិការ ​សំដៅដល់ការស្តារវិស័យទេសចរណ៍អាស៊ាន-ឥណ្ឌាជាដើម។

ក្រៅពីនេះ​វេទិកាទេសចរណ៍អាស៊ានឆ្នាំ ២០២២ ​បានផ្តោតទៅលើរួមមាន រួមគ្នាផ្សព្វផ្សាយ និង​ទីផ្សារ​នៅ​ពិព័រណ៍​ ទេសចរណ៍ថ្នាក់តំបន់ និងអន្តរជាតិ, ផ្លាស់ប្តូរបទពិសោធន៍​លើការរៀបចំ​ផែនការ និងគ្រប់គ្រងគោលដៅទេសចរណ៍, ជំរុញនិងលើក ទឹកចិត្តផ្នែកឯកជន ដើម្បីវិនិយោគក្នុង​ឧស្សាហកម្ម​ទេសចរណ៍, ជួយគ្នាទៅវិញទៅមកលើការអភិវឌ្ឍធនធានមនុស្ស ​និងកសាងសមត្ថ ភាព​ដល់អ្នកជំនាញ, ជំរុញកិច្ចសហប្រតិបត្តិការលើការរៀបចំព្រឹត្តិការណ៍​ទេសចរណ៍ សន្និសីទ​ពិព័រណ៍​ទេសចរណ៍ ​និងកិច្ចប្រជុំផ្សេងៗជាដើម៕អត្ថបទ៖ សុន រ៉ាឌី