យោងតាមទូរទស្សន៍រដ្ឋ al-Ekhbariya របស់ប្រទេសស៊ីរីបានឱ្យដឹងថា កងកម្លាំងអ៊ីស្រាអែលបានវាយប្រហារជាបន្តបន្ទាប់ទៅលើអតីតបន្ទាយយោធានៅក្រុង Kiswa ភាគនិរតីរដ្ឋធានីដាម៉ាស ប្រទេសស៊ីរី។

វីដេអូដែលត្រូវបានផ្ទៀងផ្ទាត់ដោយទីភ្នាក់ងារត្រួតពិនិត្យការពិត Sanad របស់សារព័ត៌មាន Al Jazeera បានបង្ហាញយន្តហោះអ៊ីស្រាអែលកំពុងវាយប្រហារទីតាំងនានានៅក្នុងភូមិកាលពីថ្ងៃពុធ។ ទន្ទឹមនឹងនេះ ប្រភពយោធាស៊ីរីបាននិយាយថា កងទ័ពអ៊ីស្រាអែលបានធ្វើប្រតិបត្តិការចុះចតនៅក្នុងបន្ទាយ ដោយប្រើប្រាស់ឧទ្ធម្ភាគចក្រចំនួនបួនគ្រឿង។

យោងតាមប្រភពដដែលបានឲ្យដឹងថា កងទ័ពអ៊ីស្រាអែលបាននាំយកទាហានរាប់សិបនាក់ និងឧបករណ៍ស្រាវជ្រាវក្នុងចំនួនមិនជាក់លាក់ ខណៈបានចំណាយពេលជាងពីរម៉ោងនៅទីតាំងនោះ។ គ្មានការប៉ះទង្គិចគ្នាណាមួយកើតឡើងឡើយរវាងកងទ័ពស៊ីរីនិងកងកម្លាំងអ៊ីស្រាអែលក្នុងពេលចុះចតឧទ្ធម្ភាគចក្រ ។

ប្រតិបត្តិការនេះ បានធ្វើឡើងមួយថ្ងៃបន្ទាប់ពីការវាយប្រហារដោយយានដ្រូនរបស់អ៊ីស្រាអែលសម្លាប់ទាហាន៦នាក់នៅជិតក្រុង Kiswa និងក្នុងពេលដែលមន្ត្រីស៊ីរីរបស់រដ្ឋាភិបាលប្រធានាធិបតីបណ្តោះអាសន្ន លោក Ahmed al-Sharaa បានចោទប្រកាន់អ៊ីស្រាអែលកាន់តែខ្លាំងថាកំពុងស្វែងរកការពង្រីកការគ្រប់គ្រងរបស់ខ្លួននៅក្នុងតំបន់នេះ។

នៅក្នុងសេចក្តីថ្លែងការណ៍មួយកាលពីថ្ងៃពុធ ក្រសួងការបរទេសស៊ីរីបានចាត់ទុកការវាយប្រហារនេះថាជាការរំលោភច្បាប់អន្តរជាតិ និងធម្មនុញ្ញអង្គការសហប្រជាជាតិ ហើយការវាយប្រហារនេះបង្ហាញពីការ «រំលោភយ៉ាងច្បាស់នៃដែនអធិបតេយ្យភាព និងបូរណភាពទឹកដីនៃសាធារណរដ្ឋអារ៉ាប់ស៊ីរី»។