សមាជិកក្រុមប្រឹក្សាសន្តិសុខអង្គការសហប្រជាជាតិទាំងអស់ លើកលែងតែសហរដ្ឋអាមេរិក កាលពីថ្ងៃពុធ ទី២៧ ខែសីហា បាននិយាយថា ទុរ្ភិក្សនៅតំបន់ហ្កាហ្សាគឺជា «វិបត្តិបង្កើតឡើងដោយមនុស្ស» ហើយបានព្រមានថាការប្រើប្រាស់ទុរ្ភិក្សធ្វើជាអាវុធក្នុងសង្គ្រាមត្រូវបានហាមឃាត់នៅក្រោមច្បាប់មនុស្សធម៌អន្តរជាតិ។

នៅក្នុងសេចក្តីថ្លែងការណ៍រួម សមាជិកក្រុមប្រឹក្សាចំនួន១៤ប្រទេសបានអំពាវនាវឱ្យមានបទឈប់បាញ់ជាបន្ទាន់ ដោយគ្មានលក្ខខណ្ឌ និងជាអចិន្ត្រៃយ៍ ព្រមទាំងដោះលែងចំណាប់ខ្មាំងទាំងអស់ដែលត្រូវបានឃុំខ្លួនដោយក្រុមហាម៉ាសនិងក្រុមផ្សេងទៀត បង្កើនជំនួយកាន់តែច្រើននៅទូទាំងតំបន់ហ្កាហ្សា ហើយអ៊ីស្រាអែលត្រូវដកចេញការរឹតត្បិតទាំងអស់លើការដឹកជញ្ជូនជំនួយដោយគ្មានលក្ខខណ្ឌ។

សេចក្តីថ្លែងការណ៍រួមនិយាយថា «ទុរ្ភិក្សនៅតំបន់ហ្កាហ្សា ត្រូវតែបញ្ឈប់ជាបន្ទាន់»។ «ពេលវេលាមានសារៈសំខាន់ខ្លាំង ហើយគ្រាអាសន្នផ្នែកមនុស្សធម៌ត្រូវតែបានដោះស្រាយដោយមិនពន្យារ»។

ទីក្រុងហ្កាហ្សា និងតំបន់ជុំវិញនោះ កំពុងទទួលរងគ្រោះទុរ្ភិក្សជាផ្លូវការ ហើយវានឹងអាចរាលដាល នេះបើយោងតាមអង្គការឃ្លាំមើលភាពអត់ឃ្លានសកលដែលបានកំណត់។ ប្រព័ន្ធចំណាត់ថ្នាក់ដំណាក់កាលសន្តិសុខស្បៀងរួមបញ្ចូលគ្នា បាននិយាយថាមនុស្ស ៥១៤.០០០នាក់ ដែលមានជិតមួយភាគបួននៃពលរដ្ឋប៉ាឡេស្ទីននៅក្នុងតំបន់ហ្កាហ្សាកំពុងជួបប្រទះគ្រោះទុរ្ភិក្ស ហើយចំនួននេះនឹងកើនឡើងដល់ ៦៤១.០០០នាក់ នៅចុងខែកញ្ញា។