អាជ្ញាធរក្នុងតំបន់និយាយថា ការវាយប្រហារដោយយានដ្រូន និងមីស៊ីលរបស់រុស្ស៊ី ក្នុងទ្រង់ទ្រាយធំលើរដ្ឋធានីគីវ របស់អ៊ុយក្រែន រួមទាំងការវាយប្រហារដ៏កម្រមួយនៅកណ្តាលក្រុង នាព្រឹកព្រលឹមថ្ងៃព្រហស្បតិ៍ (២៨ សីហា) នេះ បានសម្លាប់មនុស្សជាច្រើន និងរបួសជិត ៥០នាក់។ ប្រធានាធិបតីអ៊ុយក្រែនលោក Volodymyr Zelenskiy បាននិយាយនៅថ្ងៃព្រហស្បតិ៍ដដែលនេះថា ការវាយប្រហារពេញមួយយប់នោះ សម្លាប់មនុស្សយ៉ាងតិច ៨នាក់ រួមទាំងកុមារផងដែរ។

នេះជាការវាយប្រហារផ្លូវអាកាសដ៏ធំមួយដំបូងបង្អស់របស់រុស្ស៊ី លើទីក្រុងគីវ ក្នុងពេលជាច្រើនសប្តាហ៍ ខណៈកិច្ចប្រឹងប្រែងសន្តិភាពដឹកនាំដោយសហរដ្ឋអាមេរិក ដើម្បីបញ្ចប់សង្រ្គាមដ៏បង្ហូរឈាមអាយុកាលជាង ៣ឆ្នាំមកនេះ កំពុងតែជួបការលំបាក។

រដ្ឋមន្ត្រីក្រសួងមហាផ្ទៃ លោក Ihor Klymenko បញ្ជាក់ដំណឹងបឋមថា ក្នុងចំណោមអ្នកស្លាប់ទាំងនោះមានកុមារពីរនាក់ ហើយចំនួនអ្នកស្លាប់ត្រូវរំពឹងថានឹងកើនឡើងថែមទៀត ដោយក្រុមជួយសង្គ្រោះកំពុងនៅកន្លែងកើតហេតុដើម្បីជួយអ្នកជាប់នៅក្រោមគំនរបាក់បែក។

លោក Tymur Tkachenko ប្រធានរដ្ឋបាលទីក្រុងគីវ និយាយថា រុស្ស៊ីបានបាញ់ដ្រូនបន្លំភ្នែកដើម្បីបំភាន់ប្រព័ន្ធការពារដែនអាកាស ហើយនិងមីស៊ីលតម្រង់គោលដៅ រួមទាំងមីស៊ីលបាលីស្ទិក។ លោកបន្តថា ទីតាំងយ៉ាងតិច ២០កន្លែង នៅទូទាំងស្រុកចំនួន៧ នៃទីក្រុងគីវ រងផលប៉ះពាល់ ហើយអគារជិត ១០០ខ្នងរងការខូចខាត រួមទាំងផ្សារទំនើបមួយនៅកណ្តាលទីក្រុង។

ការវាយប្រហារនៅថ្ងៃព្រហស្បតិ៍នេះ ជាប្រតិបត្តិការដ្រូន និងមីស៊ីលចម្រុះដ៏ធំបំផុតរបស់រុស្ស៊ីលើកដំបូងហើយលើទីក្រុងគីវ ចាប់តាំងពីប្រធានាធិបតីអាមេរិក លោក ដូណាល់ ត្រាំ បានជួបសមភាគីរុស្ស៊ី លោក វ្ល៉ាឌីមៀ ពូទីន នៅរដ្ឋអាឡាស្កា កាលពីដើមខែនេះ ដើម្បីពិភាក្សាពីការបញ្ចប់សង្រ្គាមនៅអ៊ុយក្រែន៕