វិមានក្រឹមឡាំងបាននិយាយថា រុស្ស៊ី ប្រឆាំងយ៉ាងម៉ឺងម៉ាត់ទៅនឹងសំណើរបស់អឺរ៉ុប ស្តីពីការធានាសន្តិសុខសម្រាប់អ៊ុយក្រែន ហើយនឹងមិនអនុញ្ញាតឱ្យមានវត្តមានរបស់កងទ័ពណាតូ នៅលើទឹកដីរបស់អ្នកជិតខាងខ្លួនមួយនេះជាដាច់ខាត។

ថ្លែងទៅកាន់អ្នកសារព័ត៌មាននៅទីក្រុងមូស្គូកាលពីថ្ងៃពុធ (២៧ សីហា) អ្នកនាំពាក្យវិមានក្រឹមឡាំង លោក Dmitry Peskov បានសម្ដែងការស្វាគមន៍កិច្ចប្រឹងប្រែងនាពេលថ្មីៗនេះរបស់ប្រធានាធិបតីអាមេរិក លោក Donald Trump ក្នុងការចរចាបញ្ចប់សង្គ្រាមអ៊ុយក្រែន ប៉ុន្តែលោកក៏បញ្ជាក់ជាថ្មីថា រុស្ស៊ីនឹងមិនទទួលយកការដាក់ពង្រាយទ័ពអឺរ៉ុបនៅទីនោះ ជាផ្នែកមួយនៃការធានាសន្តិសុខទីក្រុងគីវឡើយ ព្រោះចំណុចនេះស្មើនឹងវត្តមានណាតូ ក្នុងទឹកដីអ្នកជិតខាងខ្លួន ជាអ្វីដែលរុស្ស៊ីជំទាស់យូរមកហើយ។

ការធានាសន្តិសុខទល់នឹងប្រតិបត្តិការយោធារបស់រុស្ស៊ីពេលអនាគត គឺជាការពិចារណាដ៏សំខាន់ក្នុងកិច្ចប្រឹងប្រែងបញ្ចប់សង្រ្គាមនៅអ៊ុយក្រែន ដោយប្រធានាធិបតីអ៊ុយក្រែន លោក Volodymyr Zelenskyy ប្រាប់ថា លោកចង់បានការធានាមួយជាផ្នែកនៃកិច្ចព្រមព្រៀងសន្តិភាព ឱ្យដូចបំផុតតាមដែលអាចធ្វើបាន ទៅនឹងមាត្រាទី៥ របស់ណាតូ ដែលកំណត់ការវាយប្រហារប្រឆាំងនឹងរដ្ឋសមាជិកមួយ ជាការវាយប្រហារលើទាំងអស់គ្នា។

រុស្ស៊ីទទូចថា មិនត្រូវមានវត្តមានកងទ័ពពីបណ្តាប្រទេសណាតូ ដាក់ពង្រាយនៅអ៊ុយក្រែននោះឡើយ ហើយជំនួសមកវិញបានស្នើថា ខ្លួនគួរតែជាអ្នកធានាសន្តិសុខរបស់អ៊ុយក្រែន៕