អូស្ត្រាលី កាណាដា និងហ្វីលីពីន បានដាក់ពង្រាយនាវាចម្បាំង និងយន្តហោះចំនួន ៣គ្រឿងកាលពីថ្ងៃពុធ (២៧ សីហា) សម្រាប់សមយុទ្ធការពារដែនអាកាស នៅក្នុងតំបន់ជម្លោះសមុទ្រចិនខាងត្បូង ជាទីដែលកងកម្លាំងដ៏មានឥទ្ធិពលរបស់ចិន បានបណ្តេញយន្តហោះ និងនាវារបស់ទីក្រុងម៉ានីល។

សមយុទ្ធនេះជាសកម្មភាពចុងក្រោយនៃការហ្វឹកហ្វឺនយោធាដ៏ធំបំផុតដែលអូស្ត្រាលីបានធ្វើជាមួយហ្វីលីពីន ដោយមានបុគ្គលិកយោធាជាង ៣.៦០០នាក់ សម្រាប់រយៈពេល ១៥ថ្ងៃនៃសមយុទ្ធបាញ់គ្រាប់ពិត និងសមរភូមិ ដែលនឹងបញ្ចប់នៅថ្ងៃសុក្រ ២៩ សីហា ស្អែកនេះ។

យោធាហ្វីលីពីននិយាយថា សមយុទ្ធកងទ័ពជើងទឹកនៅភាគខាងកើតថ្មប៉ប្រះទឹក Scarborough Shoal បានបញ្ចប់ដោយសុវត្ថិភាព ហើយមិនបាននិយាយពីការប៉ះទង្គិចអ្វីជាមួយឆ្មាំល្បាតឆ្នេរចិនទេ។ មន្ត្រីចិន មិនបានចេញសេចក្តីអត្ថាធិប្បាយភ្លាមៗពីសមយុទ្ធកងទ័ពជើងទឹកនោះឡើយ ប៉ុន្តែពួកគេធ្លាប់ព្រមានម្តងហើយម្តងទៀត ដោយប្ដេជ្ញាការពារថ្មប៉ប្រះទឹក និងដែនទឹកជុំវិញនោះទោះក្នុងតម្លៃណាក៏ដោយ ដែលទីក្រុងប៉េកាំងអះអាងសិទ្ធិថាជាទឹកដីរបស់ខ្លួន។

ទាំងចិន និងហ្វីលីពីន សុទ្ធតែទាមទារយកកោះ Scarborough ដែលជាចំណុចរសើបបំផុតមួយរបស់អាស៊ី និងកូនកោះតូចៗ ព្រមទាំងថ្មប៉ប្រះទឹកផ្សេងទៀតនៅសមុទ្រចិនខាងត្បូង៕