អនុរដ្ឋមន្ត្រីការបរទេស Kazem Gharibabadi បាននិយាយថា ទីក្រុងតេអេរ៉ង់ អាចនឹងច្រានចោលកិច្ចសហប្រតិបត្តិការ ជាមួយទីភ្នាក់ងារថាមពលបរមាណូអន្តរជាតិ (IAEA) ប្រសិនបើប្រទេសអឺរ៉ុបទាំងបី ចក្រភពអង់គ្លេស អាល្លឺម៉ង់ និងបារាំង ចាប់ផ្តើមយន្តការតាមផ្លូវច្បាប់ ដែលដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិឡើងវិញ ប្រឆាំងនឹងប្រទេសអ៊ីរ៉ង់។លោកបាននិយាយតាមទូរទស្សន៍ជាតិថា៖«យើងបានបញ្ជាក់យ៉ាងច្បាស់ទៅកាន់បណ្តាប្រទេស នៅអឺរ៉ុបថា ប្រសិនបើពួកគេ ផ្តួចផ្តើមយន្តការតាមផ្លូវច្បាប់នោះ អ៊ីរ៉ង់ពិតជានឹងចាត់វិធានការចាំបាច់ ក្នុងការឆ្លើយតប។ យើងក៏បានជូនដំណឹងដល់ពួកគេថា ប្រសិនបើការសម្រេចបែបនេះ កើតឡើងនោះ រាល់កិច្ចសហប្រតិបត្តិការ និងទំនាក់ទំនងជាមួយទីភ្នាក់ងារថាមពលបរមាណូអន្តរជាតិនេះ នឹងត្រូវបានគំរាមកំហែងទាំងស្រុង និងត្រូវបញ្ឈប់ជាចាំបាច់»។

គេហទំព័រព័ត៌មាន Axios បានរាយការណ៍មុននេះ ដោយដកស្រង់ប្រភពថា សហរដ្ឋអាមេរិក អង់គ្លេស អាល្លឺម៉ង់ និងបារាំង បានព្រមព្រៀងគ្នាកំណត់ចុងខែសីហា ជាថ្ងៃផុតកំណត់សម្រាប់ការឈានដល់កិច្ចព្រមព្រៀងនុយក្លេអ៊ែរជាមួយអ៊ីរ៉ង់។ បើមិនដូច្នេះទេ ប្រទេសទាំងបីរបស់អឺរ៉ុប គ្រោងនឹងចាប់ផ្តើមយន្តការតាមផ្លូវច្បាប់ ដែលនឹងដាក់ឡើងវិញនូវទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ ប្រឆាំងនឹង ទីក្រុងតេអេរ៉ង់ ដែលត្រូវបានដកចេញដោយផ្អែកលើកិច្ចព្រមព្រៀងឆ្នាំ ២០១៥។ យន្តការតាមផ្លូវច្បាប់នេះ អាចត្រូវបានធ្វើឲ្យដំណើរការឡើងវិញ ដោយចាប់ផ្តើមនៅថ្ងៃទី ១៨ ខែតុលា ឆ្នាំ ២០២៥។

សមាជិកអចិន្ត្រៃយ៍ទាំង៥នៃក្រុមប្រឹក្សាសន្តិសុខអង្គការសហប្រជាជាតិ និងអាល្លឺម៉ង់ បានធ្វើកិច្ចព្រមព្រៀងនុយក្លេអ៊ែរ ជាមួយអ៊ីរ៉ង់ក្នុងឆ្នាំ ២០១៥ ដើម្បីដោះស្រាយវិបត្តិជុំវិញកម្មវិធីនុយក្លេអ៊ែររបស់ខ្លួន។ លោក ដូណាល់ ត្រាំ (Donald Trump) បានដកសហរដ្ឋអាមេរិកចេញពីកិច្ចព្រមព្រៀងនេះ ក្នុងឆ្នាំ ២០១៨។