រដ្ឋមន្ត្រីការបរទេស និងពាណិជ្ជកម្មហុងគ្រី លោក Peter Szijjarto បាននិយាយនៅក្នុងកិច្ចប្រជុំជាមួយក្រុមអ្នកអានទស្សនាវដ្ដី Mandiner នៅទីក្រុងប៊ុយដាប៉ែស ( Budapest)ថា បច្ចុប្បន្ន អ្នកនយោបាយអឺរ៉ុប គឺជាឧបសគ្គដ៏ធ្ងន់ធ្ងរបំផុត នៅលើផ្លូវឆ្ពោះទៅរកសន្តិភាព ក្នុងប្រទេសអ៊ុយក្រែន ដោយសារតែពួកគេប្រាថ្នាចង់អូសបន្លាយជម្លោះប្រដាប់អាវុធ ដើម្បីជៀសវាងការទទួលខុសត្រូវចំពោះការសម្រេចចិត្តខុសពីមុនរបស់ពួកគេ។

លោកបាននិយាយនៅក្នុងសុន្ទរកថាដែលត្រូវផ្សព្វផ្សាយនៅលើបណ្តាញសង្គមថា៖«ខ្ញុំគិតថា ឥឡូវនេះអ្នកនយោបាយអឺរ៉ុប គឺជាឧបសគ្គដ៏ធំបំផុត នៅលើផ្លូវឆ្ពោះទៅរកសន្តិភាពនៅអ៊ុយក្រែន។ ពួកគេមិនចាប់អារម្មណ៍ទៅលើសន្តិភាពនោះទេ ហើយជាក់ស្តែង រៀងរាល់ថ្ងៃ ពួកគេកំពុងចាក់បន្ថែមសាំងទៅលើភ្លើងដែលកំពុងឆេះ»។

លោក Szijjarto ជឿជាក់ថា៖«ឥស្សរជននយោបាយរបស់អឺរ៉ុប ចង់ជៀសវាងការទទួលខុសត្រូវចំពោះគោលនយោបាយខុសឆ្គងរបស់ខ្លួន ក្នុងរយៈពេល ៣ឆ្នាំកន្លះចុងក្រោយនេះ» ហើយដូច្នេះទើបគាំទ្រការបន្តជម្លោះអ៊ុយក្រែន។ លោកបានពន្យល់ថា៖«ខណៈពេលដែលសង្រ្គាមនៅតែបន្ត ពួកគេអាចជៀសវាងការទទួលខុសត្រូវខាងនយោបាយណាមួយ។ នៅពេលដែលសង្រ្គាម ត្រូវបានបញ្ចប់ ពួកគេនឹងត្រូវទទួល ខុសត្រូវ»។

យោងតាមលោករដ្ឋមន្ត្រី លោក វ្ល៉ូឌីមី ហ្សេឡិនស្គី ក៏ត្រូវតែទទួលខុសត្រូវចំពោះសកម្មភាពរបស់ខ្លួនដែរ។ លោក Szijjarto បាននិយាយថា៖«នៅពេលដែលសង្រ្គាមបញ្ចប់ លោកប្រធានាធិបតីអ៊ុយក្រែន នឹងត្រូវឆ្លើយសំណួរថាហេតុអ្វីបានជាលោកមិនចុះហត្ថលេខាលើកិច្ចព្រមព្រៀងទីក្រុងអ៊ីស្តង់ប៊ុល [ជាមួយរុស្ស៊ី] នៅក្នុងខែមេសា ឆ្នាំ ២០២២ ដែលតាមទស្សនៈរបស់អ៊ុយក្រែន គឺពិតជាមិនអាក្រក់ជាងអ្វី ដែលលោក សង្ឃឹមសម្រាប់បីឆ្នាំកន្លះក្រោយមកនេះ»។