បើយោងតាមសេចក្ដីរាយការណ៍ពីប្រព័ន្ធផ្សព្វផ្សាយគ្រប់គ្រងដោយរដ្ឋ បានឲ្យដឹងថា ប្រទេសរុស្ស៊ី និងចិនបានធ្វើការល្បាតនាវាមុជទឹករួមគ្នាលើកដំបូងមិនធ្លាប់មាន នៅតំបន់ប៉ាស៊ីហ្វិក។

ហើយយោងតាមសេចក្តីថ្លែងការណ៍របស់កងនាវាចរប៉ាស៊ីហ្វិករុស្ស៊ី បានឲ្យដឹងថា ការល្បាតដោយនាវាមុជទឹកប្រើម៉ាស៊ូតជំរុញដោយអគ្គិសនី បានចាប់ផ្តើមនៅដើមខែសីហា ហើយនាវាមុជទឹករុស្ស៊ី Volkhov បានធ្វើដំណើរប្រហែល ២.០០០ម៉ាយល៍ (ជាង ៣.២០០គីឡូម៉ែត្រ)។

សេចក្តីថ្លែងការណ៍នោះបានឲ្យដឹងទៀតថា នាវាមុជទឹកបានល្បាតនៅក្នុងសមុទ្រជប៉ុន និងសមុទ្រចិនខាងកើត ។ ប្រទេសចិនមិនបានបញ្ជាក់ពីការល្បាតនេះទេ ប៉ុន្តែកាលពីថ្ងៃពុធ (ទី២៧ ខែសីហា) សារព័ត៌មានរដ្ឋ Global Times បានលើកឡើងពីប្រតិបត្តិការនេះនៅក្នុងសេចក្ដីរាយការណ៍ ដោយដកស្រង់របាយការណ៍របស់រុស្ស៊ី។

សារព័ត៌មាន Global Times បានដកស្រង់សម្តីអ្នកជំនាញយោធាចិន លោក Zhang Junshe ដែលបាននិយាយថា៖ «ការល្បាតនាវាមុជទឹករួមគ្នាជាលើកដំបូងនេះ បានបង្ហាញពីការជឿទុកចិត្តគ្នាទៅវិញទៅមកជាយុទ្ធសាស្រ្តក្នុងកម្រិតខ្ពស់ រវាងចិន និងរុស្ស៊ី»។

លោក Zhang បានប្រាប់សារព័ត៌មាន Global Times ថា៖ «តាមរយៈសមយុទ្ធ និងការល្បាតរួមគ្នា កងនាវាចរចិន និងរុស្ស៊ី កំពុងបង្កើនសមត្ថភាពរបស់ខ្លួនជាលំដាប់ ក្នុងការការពារសន្តិសុខ និងស្ថិរភាពដែនសមុទ្ររួមគ្នា»។

ចំណែកសារព័ត៌មាន TASS របស់រុស្ស៊ី បានរាយការណ៍កាលពីថ្ងៃពុធថា គោលដៅនៃការល្បាតនេះ «គឺដើម្បីពង្រឹងកិច្ចសហប្រតិបត្តិការលើនាវាចរណ៍ រវាងប្រទេសទាំង២ ធានាសន្តិភាព និងស្ថិរភាព នៅក្នុងតំបន់អាស៊ី-ប៉ាស៊ីហ្វិក ត្រួតពិនិត្យតំបន់ដែនសមុទ្រ ហើយនិងការពារទីតាំងសេដ្ឋកិច្ចដែនសមុទ្ររបស់រុស្ស៊ី និងចិន»៕