រដ្ឋមន្ត្រីក្រសួងហិរញ្ញវត្ថុប្រេស៊ីល លោក Fernando Haddad កាលពីថ្ងៃពុធ (ទី២៧ ខែសីហា) បានប្រាប់ឲ្យដឹងថា ប្រេស៊ីលអាចនឹងតវ៉ា នៅតុលាការរបស់អាមេរិក ជំទាស់នឹងការយកពន្ធខ្ពស់ដែលដាក់ដោយរដ្ឋបាលរបស់លោកប្រធានាធិបតី Donald Trump លើការនាំចូលទំនិញរបស់អាមេរិកពីប្រទេសតំបន់អាមេរិកខាងត្បូងមួយនេះ។

លោក Haddad បានប្រាប់សារព័ត៌មានក្នុងស្រុក UOL ថា «យើងនឹងទៅតុលាការ ប្រសិនបើចាំបាច់» ដោយលោកបានបន្ថែមថា ប្រេស៊ីលនឹងមិនចូលរួមពាក់ព័ន្ធនឹងកិច្ចប្រឹងប្រែងបញ្ចុះបញ្ចូលណាមួយឡើយ។

គួរបញ្ជាក់ថា ប្រធានាធិបតីអាមេរិក លោក Trump បានដាក់អត្រាពន្ធ ៥០ភាគរយលើទំនិញប្រេស៊ីលមួយចំនួន ក្នុងខែសីហា ដោយលើកឡើងពីអ្វីដែលលោកហៅថា «វិធានការរបស់ក្រុមអាក្រក់» ប្រឆាំងនឹងអតីតប្រធានាធិបតី លោក Jair Bolsonaro ដែលមានភាពចុះសម្រុងជាមួយលោក Trump នៅពេលពួកលោកទាំង២ កំពុងកាន់តំណែង ហើយកំពុងត្រូវបានកាត់ទោសលើការចោទប្រកាន់ពីបទធ្វើរដ្ឋប្រហារ ហើយមេដឹកនាំអាមេរិក ក៏បានចោទប្រកាន់ផងដែរ ពីការអនុវត្តពាណិជ្ជកម្មអយុត្តិធម៌។

ប្រេស៊ីលបានបង្ហាញ «ការខឹងសម្បា» ចំពោះការដំឡើងពន្ធនេះ ដោយកត់សម្គាល់ថា ខ្លួនបានមានឱនភាពពាណិជ្ជកម្មជាធម្មតាជាមួយសហរដ្ឋអាមេរិក។ 

បន្ទាប់មក ការិយាល័យនៃអគ្គមេធាវីរបស់ប្រទេសប្រេស៊ីល បានឲ្យដឹងថា ខ្លួនបានជួលក្រុមហ៊ុនអាមេរិក Arnold & Porter Kaye Scholer ឲ្យធ្វើតួនាទីជាអ្នកការពារផ្លូវច្បាប់ សម្រាប់រដ្ឋប្រេស៊ីល ពាក់ព័ន្ធនឹងការដាក់ទណ្ឌកម្មនេះ។

ការិយាល័យបានឲ្យដឹងទៀតថា វិសាលភាពនៃសកម្មភាព សម្រាប់ក្រុមហ៊ុនច្បាប់នេះ រួមមានការការពារប្រឆាំងនឹងវិធានការពន្ធ និងការរឹតបន្តឹងផ្នែកហិរញ្ញវត្ថុដែលផ្តោតលើប្រទេសប្រេស៊ីល និងមន្ត្រីសាធារណៈរបស់ខ្លួន។ ការរិយាល័យបានបញ្ជាក់ថា យុទ្ធសាស្រ្ត គួរតែត្រូវបានកំណត់នៅប៉ុន្មានថ្ងៃខាងមុខនេះ៕