នាយករដ្ឋមន្រ្តីថៃ លោកស្រី Paetongtarn Shinawatra (ផែថងថាន ស៊ីណាវ៉ាត់) នឹងមិនទៅបង្ហាញខ្លួននៅតុលាការធម្មនុញ្ញ នាថ្ងៃសុក្រ (ទី២៩ ខែសីហា) នេះ ដើម្បីស្តាប់សាលក្រមជាប្រវត្តិសាស្ត្ររបស់តុលាការ ជុំវិញបណ្តឹងចោទប្រកាន់ទម្លាក់តំណែង ជាការសម្រេចដែលអាចនឹងបញ្ចប់តួនាទីរបស់លោកស្រី ក្នុងនាមជាប្រមុខរដ្ឋាភិបាល ប្រសិនបើត្រូវបានវិនិច្ឆ័យថា មានទោសប្រព្រឹត្តិបទល្មើសព្រហ្មទណ្ឌ ដោយការរំលោភលើក្រមសីលធម៌ធ្ងន់ធ្ងរ និងបង្ហាញនូវកង្វះខាតពីការមានភាពស្មោះត្រង់។

បើតាមលោក Somkid Chuakhong (ស៊ុមឃីត ឈឿឃុង) ជំនួយការរងរបស់នាយករដ្ឋមន្ត្រីរូបនេះ បានឲ្យដឹងថា ជំនួសឲ្យការមានវត្តមាននៅក្នុងតុលាការ ដើម្បីស្តាប់សាលក្រមនាថ្ងៃសុក្រ ជុំវិញសំណុំរឿងចោទប្រកាន់ទម្លាក់តំណែងដែលត្រូវបានប្ដឹងប្រឆាំងលោកស្រីនោះ លោកស្រី Paetongtarn បានជ្រើសរើសចូលទៅកាន់វិមានរដ្ឋាភិបាល ជាកន្លែងដែលលោកស្រីនឹងត្រួតពិនិត្យនីតិវិធីនានា នៅក្នុងក្រុមនៃសមាជិកសភារបស់គណបក្ស Pheu Thai (ភឿថៃ) និងសមាជិកគណៈរដ្ឋមន្ត្រី។

គួរបញ្ជាក់ថា ខណៈដែលបច្ចុប្បន្នកំពុងបំពេញតួនាទីជារដ្ឋមន្ត្រីក្រសួងវប្បធម៌ លោកស្រី Paetongtarn ដែលត្រូវបានព្យួរដោយតុលាការធម្មនុញ្ញពីតួនាទីជាប្រមុខរដ្ឋាភិបាល ដែលរង់ចាំការសម្រេចរបស់តុលាការនៅថ្ងៃសុក្រ មានសិទ្ធិចូលទៅកាន់ផ្នែកខ្លះនៃវិមានរដ្ឋាភិបាល។

សំណុំរឿងចោទប្រកាន់ទម្លាក់តំណែងដែលត្រូវបានប្ដឹងដោយសមាជិកព្រឹទ្ធសភាចំនួន ៣៦រូប ចោទប្រកាន់នាយករដ្ឋមន្រ្តីរូបនេះថា បានបំពានក្រមសីលធម៌របស់អ្នកនយោបាយយ៉ាងធ្ងន់ធ្ងរ និងប្រព្រឹត្តដោយគ្មានភាពស្មោះត្រង់ ពោលគឺត្រូវបានចោទថា ស្មើនឹងការធ្វើនូវទង្វើក្បត់ជាតិ ដែលប៉ះពាល់ដល់ផលប្រយោជន៍ជាតិ និងកិត្យានុភាពរបស់ប្រទេសថៃ។ 

ប្រសិនបើរកឃើញថា មានទោសដូចការចោទប្រកាន់ដោយតុលាការណាមួយនោះ លោកស្រី Paetongtarn មិនត្រឹមតែត្រូវបានដកហូតតំណែងជានាយករដ្ឋមន្ត្រីជាប់ឆ្នោតប៉ុណ្ណោះទេ ប៉ុន្តែថែមទាំងត្រូវបានហាមឃាត់មិនឲ្យចូលរួមក្នុងសកម្មភាពនយោបាយក្នុងកម្រិតណាមួយ រយៈពេលជាច្រើនឆ្នាំ ឬអស់មួយជីវិត៕