រដ្ឋាភិបាលប្រទេសអ៊ុយក្រែនបាននិយាយថា ខ្លួននឹងអនុញ្ញាតឱ្យបុរសមានអាយុពី១៨ ដល់២២ឆ្នាំ ចាកចេញពីប្រទេស។ បុរសភាគច្រើនដែលមានអាយុចន្លោះពី១៨ ដល់៦០ឆ្នាំ ត្រូវបានហាមឃាត់មិនឱ្យឆ្លងព្រំដែនចាប់តាំងពីមានបទបញ្ជាកែណ្ឌជាទូទៅត្រូវបានចេញក្នុងការឆ្លើយតបទៅនឹងការឈ្លានពានរបស់រុស្ស៊ី។ នាយករដ្ឋមន្រ្តី លោកស្រី Yuliia Svyrydenko បានបង្ហោះនៅលើបណ្តាញផ្សព្វផ្សាយសង្គមថា «បុរសដែលមានអាយុពី១៨ដល់២២ឆ្នាំ នឹងអាចឆ្លងព្រំដែនបានដោយគ្មានការរារាំងអំឡុងពេលច្បាប់អាជ្ញាសឹក» ។

រដ្ឋមន្ត្រីក្រសួងមហាផ្ទៃ លោក Ihor Klymenko ក៏បានបង្ហោះសារនៅលើបណ្តាញផ្សព្វផ្សាយសង្គមផងដែរ ដោយលោកបានសរសេរថា «គោលបំណងនៃចំណាត់ការនេះគឺជាចម្បងដើម្បីផ្តល់ឱ្យយុវជនអ៊ុយក្រែននូវឱកាសដ៏ទូលំទូលាយសម្រាប់ការសិក្សាអប់រំ កម្មវិធីហាត់ការ និងការងារស្របច្បាប់នៅបរទេស ដូច្នេះនៅពេលក្រោយមកពួកគេអាចប្រើប្រាស់បទពិសោធន៍ដែលពួកគេទទួលបានដើម្បីរួមចំណែកដល់ការអភិវឌ្ឍប្រទេសអ៊ុយក្រែន»។

ប្រព័ន្ធផ្សព្វផ្សាយជាច្រើននិយាយថា ឪពុកម្តាយជាច្រើនក្នុងប្រទេសអ៊ុយក្រែនបញ្ជូនកូនៗរបស់ពួកគេទៅក្រៅប្រទេសមុនពេលកូនមានអាយុ១៨ឆ្នាំ។ អ្នកសង្កេតការណ៍មួយចំនួនជឿថាការចំណាត់ការនេះគឺជាការខិតខំប្រឹងប្រែងរបស់រដ្ឋាភិបាលដើម្បីទប់ស្កាត់ការចាកចេញរបស់យុវជន។