យោងតាមក្រុមអ្នកវិទ្យាសាស្ត្របានឲ្យដឹងថា ចំហេះព្រៃដែលបានឆាបឆេះនៅទូទាំងប្រទេសក្រិក ទួរគី និងកោះស៊ីប នារដូវក្តៅនេះ មានកម្រិតកាន់តែខ្លាំងឡើង ២២ភាគរយ និងទំនងជាកើនឡើងបន្ថែមទៀតក្នុងកម្រិត ១០ដងជាងពិភពលោកដែលមិនមានការប្រែប្រួលអាកាសធាតុ។

អាកាសធាតុក្តៅខ្លាំង ស្ងួត និងខ្យល់បក់ខ្លាំង ដែលធ្វើឲ្យមានការរីករាលដាលអគ្គិភ័យយ៉ាងច្របូកច្របល់ នៅភាគខាងកើតតំបន់សមុទ្រមេឌីទែរ៉ាណេ នឹងកើតឡើងតែម្តងគត់រៀងរាល់ ១សតវត្សន៍ ប្រសិនបើគ្មានការប្រែប្រួលអាកាសធាតុដែលបង្កើតឡើងដោយមនុស្ស។ នេះបើយោងតាមអ្នកស្រាវជ្រាវមកពីស្ថាប័នអាកាសធាតុពិភពលោក (World Weather Attribution) ជាក្រុមអ្នកវិទ្យាសាស្ត្រដែលធ្វើការសិក្សាយ៉ាងឆាប់រហ័ស ដោយប្រើវិធីសាស្ត្រពិនិត្យស្ថានភាពដូចគ្នា ដើម្បីកំណត់ឥទ្ធិពលនៃបម្រែបម្រួលអាកាសធាតុ លើព្រឹត្តិការណ៍អាកាសធាតុអាក្រក់ធ្ងន់ធ្ងរ។

ការឡើងកម្ដៅជាមធ្យម ១,៣អង្សាសេ ដែលពិភពលោកបានជួបប្រទះតាំងពីសម័យមុនឧស្សាហ៍កម្ម មានន័យថា ព្រឹត្តិការណ៍បែបនេះ អាចកើតឡើងម្តងក្នុងរយៈពេល ២០ឆ្នាំ។

លោកបណ្ឌិត Bikem Ekberzade អ្នកស្រាវជ្រាវនៅវិទ្យាស្ថាន Eurasia Earth Sciences ក្នុងទីក្រុងអ៊ីស្តង់ប៊ុល ប្រទេសទួរគី បាននិយាយថា៖ «យើងកំពុងសម្លឹងមើលរូបភាពដ៏គួរឲ្យបារម្ភ សម្រាប់ព្រៃឈើ នៅតំបន់អឺរ៉ុបភាគខាងត្បូង។ ដោយបម្រែបម្រួលអាកាសធាតុអាចអំណោយផលដល់លក្ខខណ្ឌមានអគ្គិភ័យកាន់តែខ្លាំង យើងនឹងឃើញចំហេះព្រៃកាន់តែធំ ធ្ងន់ធ្ងរ និងញឹកញាប់ជាងមុន»។

អឺរ៉ុបបានជួបប្រទះនូវឆ្នាំដ៏អាក្រក់បំផុតរបស់ខ្លួន ក្នុងកំណត់ត្រា សម្រាប់ចំហេះព្រៃ ដោយផ្ទៃដីជាង ១លានហិកតា ត្រូវបានឆាបឆេះនៅទូទាំងតំបន់។ ទ្វីបនេះឡើងកម្ដៅលឿនជាងទ្វីបដទៃទៀត ហើយតំបន់សមុទ្រមេឌីទែរ៉ាណេ គឺជាកន្លែងងាយរងគ្រោះពីការប្រែប្រួលអាកាសធាតុ ដោយរលកកម្ដៅ គ្រោះរាំងស្ងួត និងខ្យល់បក់ខ្លាំង ធ្វើឲ្យមានអគ្គិភ័យកាន់តែញឹកញាប់ និងខ្លាំងជាងមុន៕