អ្នកស្រាវជ្រាវមួយក្រុម កាលពីថ្ងៃពុធ (ទី២៧ ខែសីហា) បានឲ្យដឹងថា ប្រទេសអ៊ីរ៉ង់បានចាប់ផ្តើមប្រតិបត្តិការបោសសម្អាតយ៉ាងលឿនរហ័សមួយ ក្នុងទីតាំងទាក់ទងនឹងនុយក្លេអ៊ែរ នៅភាគខាងជើងទីក្រុងតេអេរ៉ង់ដែលរងគ្រោះដោយការវាយប្រហារតាមអាកាសរបស់អ៊ីស្រាអែល ដោយនោះទំនងជានឹងលុបបំបាត់នូវភស្តុតាងនៃការងារអភិវឌ្ឍន៍អាវុធនុយក្លេអ៊ែរ។

វិទ្យាស្ថានវិទ្យាសាស្ត្រ និងសន្តិសុខអន្តរជាតិ បានឲ្យដឹងថា រូបភាពពីផ្កាយរណប «បង្ហាញឲ្យឃើញពីកិច្ចប្រឹងប្រែងយ៉ាងខ្លាំងរបស់អ៊ីរ៉ង់ ក្នុងការវាយកម្ទេច ឬបំផ្លាញចោលយ៉ាងឆាប់រហ័សនូវអគាររងការខូចខាត ដែលទំនងជាសម្អាតនូវភស្តុតាងនៃសកម្មភាពស្រាវជ្រាវ និងអភិវឌ្ឍន៍អាវុធនុយក្លេអ៊ែរ»។

វិទ្យាស្ថាននេះ គឺជាក្រុមស្រាវជ្រាវឯករាជ្យដែលផ្តោតលើការបញ្ឈប់ការរីករាលដាលនៃអាវុធនុយក្លេអ៊ែរ និងត្រូវបានដឹកនាំដោយលោក David Albright អតីតមន្ត្រីអធិការកិច្ចនុយក្លេអ៊ែររបស់អង្គការសហប្រជាជាតិ (UN)។

ស្ថានទូតអ៊ីរ៉ង់ ប្រចាំនៅ UN មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ទីក្រុងតេអេរ៉ង់តែងតែបានបដិសេធថា ខ្លួនមិនបានប្រឹងប្រែងផលិតអាវុធនុយក្លេអ៊ែរឡើយ ហើយបានលើកឡើងម្តងហើយម្តងទៀតថា កម្មវិធីរបស់ខ្លួន គឺសម្រាប់គោលបំណងសន្តិភាព។

របាយការណ៍នៅលើគេហទំព័រ Mojdeh លេចឡើងនៅពេលដែលអង្គការឃ្លាំមើលនុយក្លេអ៊ែររបស់អង្គការសហប្រជាជាតិ បន្តកិច្ចពិភាក្សានៅទីក្រុងតេអេរ៉ង់ ស្តីពីការចាប់ផ្តើមការងារអធិការកិច្ចឡើងវិញ ដែលត្រូវបានរំខានដោយសង្គ្រាមថ្ងៃទី ១៣-២៤ ខែមិថុនា រវាងអ៊ីស្រាអែល និងអ៊ីរ៉ង់ និងការវាយប្រហារថ្ងៃទី២២ ខែមិថុនា ពីសំណាក់សហរដ្ឋអាមេរិកលើទីតាំងនុយក្លេអ៊ែរសំខាន់ៗចំនួន ៣ របស់ប្រទេសនេះ៕