ឯកអគ្គរដ្ឋទូតរបស់សហភាពអឺរ៉ុប (EU) លោកស្រី Katarina Mathernova នៅព្រឹកថ្ងៃព្រហស្បតិ៍ (ទី២៧ ខែសីហា) នេះ បានប្រកាសថា ហេតុការណ៍ដ៏គួរឲ្យរន្ធត់ជាបន្តបន្ទាប់ដែលកើតឡើងដោយសារការវាយប្រហារចុងក្រោយបង្អស់របស់រុស្ស៊ីលើទីក្រុងគីវ បានធ្វើឲ្យមានការខូចខាតយ៉ាងធ្ងន់ធ្ងរ ចំពោះអគារគណៈប្រតិភូរបស់ប្លុក នៅក្នុងរដ្ឋធានីរបស់ប្រទេសអ៊ុយក្រែន។

ការវាយប្រហារពេញមួយយប់ ដែលជាផ្នែកនៃយុទ្ធនាការសាបព្រោះអំពើភេរវកម្ម និងភាពចលាចលរបស់ទីក្រុងមូស្គូ បានបណ្ដាលឲ្យមនុស្សយ៉ាងហោចណាស់ ១៤នាក់ស្លាប់ និងរាប់សិបនាក់រងរបួស ដោយបានបង្កឲ្យមានការបំផ្លិចបំផ្លាញយ៉ាងធំធេងនៅទូទាំងទីក្រុងនេះ។ លោកស្រី Mathernova បាននិយាយថា៖ «នេះគឺជាចម្លើយពិតប្រាកដជាក់ស្ដែងរបស់ទីក្រុងមូស្គូ ចំពោះកិច្ចខិតខំប្រឹងប្រែងសន្តិភាព»។

លោក Ursula von der Leyen ប្រធានគណៈកម្មការអឺរ៉ុបបានបញ្ជាក់ថា សមាជិកទាំងអស់នៃគណៈប្រតិភូសហភាពអឺរ៉ុប «មានសុវត្ថិភាព»។ លោកស្រីបានឲ្យដឹងនៅលើបណ្ដាញសង្គមថា៖ «រុស្ស៊ីត្រូវតែបញ្ឈប់ការវាយប្រហារដោយមិនកំណត់គោលដៅច្បាស់លាស់របស់ខ្លួន លើហេដ្ឋារចនាសម្ព័ន្ធស៊ីវិលជាបន្ទាន់ ហើយចូលរួមការចរចា ដើម្បីសន្តិភាពប្រកបដោយយុត្តិធម៌ និងយូរអង្វែង»។

ចំណែកលោក António Costa ប្រធានក្រុមប្រឹក្សាអឺរ៉ុប បាននិយាយថា លោកពិតជា «រន្ធត់» ដោយសារការវាយប្រហារនេះ ហើយបានបង្ហាញការគាំទ្រ ចំពោះប្រជាជនអ៊ុយក្រែន និងបុគ្គលិកសហភាពអឺរ៉ុប។ លោក Costa បានលើកឡើងថា៖ «សហភាពអឺរ៉ុបនឹងមិនមានការភ័យខ្លាច ដោយសារការបំភិតបំភ័យឡើយ។ ការលុកលុយឈ្លានពានរបស់រុស្ស៊ី គ្រាន់តែមកជួយពង្រឹងការតាំងចិត្តរបស់យើង ក្នុងការឈរជាមួយអ៊ុយក្រែន និងប្រជាជនរបស់ប្រទេសនេះប៉ុណ្ណោះ»៕