ទីក្រុងតូចៗចំនួន ២ នៅភាគខាងកើតនៃប្រទេសប៉ាគីស្ថាន គឺ Chiiot និង Hafizabad ប្រឈមនឹងហានិភ័យនៃការមានទឹកជំនន់ដ៏មហន្តរាយ ប្រសិនបើទំនប់ប្រព័ន្ធធារាសាស្ត្របាក់ នៅផ្នែកខាងលើនសទន្លេដ៏សំខាន់មួយ បន្ទាប់ពីភ្លៀងធ្លាក់ខ្លាំងបានធ្វើឲ្យកម្រិតទឹកលើសពីសមត្ថភាពផ្ទុករបស់វា។

ប្រទេសជិតខាងនឹងគ្នាប្រដាប់ដោយអាវុធនុយក្លេអ៊ែរ គឺឥណ្ឌា និងប៉ាគីស្ថាន កំពុងជួបការលំបាក ដោយត្រូវប្រឈមជាមួយនឹងភ្លៀងធ្លាក់ខ្លាំង នារដូវមូសុង ដែលបានបណ្ដាលឲ្យមានទឹកជំនន់យ៉ាងគំហុកភ្លាមៗ ទឹកទន្លេឡើងកាន់តែខ្លាំង និងទំនប់ទឹកពេញប្រៀប ដោយមានអ្នកស្លាប់ ៦០នាក់ ក្នុងខែនេះ នៅតំបន់កាស្មៀរគ្រប់គ្រងដោយឥណ្ឌា ហើយចំនួនអ្នកបាត់បង់បង់ជីវិត នៅប៉ាគីស្ថាន គឺ ៨០៥នាក់ គិតចាប់តាំងពីចុងខែមិថុនាមក។

ទឹកជំនន់ណាមួយដែលដាក់ការទទួលខុសត្រូវទៅលើប្រទេសឥណ្ឌានោះ ធ្វើឲ្យទំនាក់ទំនងពេញទៅដោយភ្លើងកំហឹង រវាងគូសត្រូវដ៏ស្រួចស្រាល់ទាំង២ ពោលគឺឈានទៅរកការប្រឈមមុខដាក់គ្នាយ៉ាងតានតឹង ចាប់តាំងពីមានជម្លោះរយៈពេលខ្លីមួយ កាលពីខែឧសភា ដែលជាការប្រយុទ្ធគ្នាដ៏អាក្រក់បំផុតជាលើកដំបូងរបស់ប្រទេសទាំង២ ក្នុងរយៈពេលជាច្រើនទសវត្សរ៍។

កម្រិតទឹកទន្លេ Chenab ក្នុងខេត្ត Punjab របស់ប្រទេសប៉ាគីស្ថាន បានផ្ដល់ហានិភ័យធ្វើឲ្យទំនប់បេតុង នៅភូមិ Qadirabad បាក់។ ទំនប់នោះមានប្រវែង ៣.៣០០ហ្វីត (១.០០០ម៉ែត្រ) ដែលគ្រប់គ្រងលំហូរទឹកទន្លេ និងបង្ហូរចូលទៅក្នុងប្រព័ន្ធធារាសាស្រ្តតាមប្រឡាយ។

អ្នកជំនាញបច្ចេកទេសនៅអាជ្ញាធរជាតិគ្រប់គ្រងគ្រោះមហន្តរាយ បានឲ្យដឹងថា «នេះគឺជាស្ថានភាពវិបត្តិមួយ» ដោយបានបន្ថែមថា ការបាក់ទំនប់នេះ អាចបំផ្លាញទីប្រជុំជនដែលជាទីជ្រកកោនរបស់មនុស្សជាង ២,៨លាននាក់។

មន្ត្រីដែលបាននិយាយក្នុងលក្ខខណ្ឌមិនបញ្ចេញឈ្មោះរូបនេះ បានបញ្ជាក់ថា៖ «ក្រោមការត្រួតពិនិត្យជាប្រចាំរបស់អ្នកជំនាញ និងរដ្ឋបាល កម្រិតទឹកកំពុងស្រកចុះ ប៉ុន្តែវានៅតែមិនស្ថិតនៅក្រោមកម្រិតគ្រោះថ្នាក់នោះឡើយ»៕