វិមានក្រឹមឡាំង នៅថ្ងៃព្រហស្បតិ៍ (ទី២៨ ខែសីហា) នេះ បានបញ្ជាក់ថា ខ្លួននៅតែចាប់អារម្មណ៍ ក្នុងការបន្តកិច្ចចរចាសន្តិភាព នៅអ៊ុយក្រែន បើទោះបីជាមានការវាយប្រហារដ៏ធំ និងបង្ហូរឈាមរបស់រុស្សីពេញមួយយប់លើទីក្រុងគីវក៏ដោយ។

មន្ត្រីអ៊ុយក្រែនបាននិយាយថា ការវាយប្រហារនេះ បានសម្លាប់មនុស្សយ៉ាងតិច ១៥នាក់ ក្នុងនោះមានទាំងកុមារ ៤នាក់ផងដែរ ជាការវាយប្រហារលើរដ្ឋធានីរបស់អ៊ុយក្រែន ដែលប្រធានាធិបតី លោក Volodymyr Zelenskyy បាននិយាយថា នេះគឺជាចម្លើយរបស់ទីក្រុងមូស្គូ ចំពោះកិច្ចប្រឹងប្រែងការទូត ដើម្បីបញ្ចប់សង្រ្គាមរបស់ខ្លួន។

នៅពេលត្រូវបានសួរថា តើមានភាពផ្ទុយគ្នាយ៉ាងណាដែរ រវាងបំណងប្រាថ្នាដែលបានបញ្ជាក់របស់ទីក្រុងមូស្គូ ក្នុងការធ្វើឲ្យមានវឌ្ឍនភាព ក្នុងកិច្ចចរចាសន្តិភាព និងការវាយប្រហារនោះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា ភាគីទាំង២ កំពុងបន្តវាយប្រហារគ្នាទៅវិញទៅមក ប៉ុន្តែថារុស្ស៊ីនៅតែចាប់អារម្មណ៍ក្នុងការសម្រេចបាននូវគោលដៅរបស់ខ្លួន តាមរយៈការទូត។

លោក Peskov បានបញ្ជាក់ថា កងកម្លាំងរុស្ស៊ីកំពុងបន្តកំណត់គោលដៅយោធាអ៊ុយក្រែន និងហេដ្ឋារចនាសម្ព័ន្ធពាក់ព័ន្ធនឹងយោធា។ លោកបានលើកឡើងម្តងហើយម្តងទៀតថា រុស្ស៊ីមិនកំណត់គោលដៅជនស៊ីវិលដោយមានចេតនានោះទេ។

លោកបានបន្ថែមថា អ៊ុយក្រែនក៏កំពុងបន្តការវាយប្រហារដោយខ្លួនឯងផ្ទាល់ ប្រឆាំងនឹងហេដ្ឋារចនាសម្ព័ន្ធរុស្ស៊ីដែរ ក្នុងនោះមានរួមទាំងលើហេដ្ឋារចនាសម្ព័ន្ធស៊ីវិលផងដែរ៕