ឯកអគ្គរដ្ឋទូតអ៊ីរ៉ង់ ប្រចាំនៅប្រទេសអូស្ត្រាលី ត្រូវបានគេមើលឃើញកំពុងរៀបចំចាកចេញ នៅថ្ងៃព្រហស្បតិ៍ (ទី២៨ ខែសីហា) នេះ ពោលគឺប៉ុន្មានថ្ងៃបន្ទាប់ពីនាយករដ្ឋមន្ត្រី លោក Anthony Albanese បានបញ្ជាឲ្យលោកចាកចេញ ពាក់ព័ន្ធនឹងការចោទប្រកាន់ ដែលថា ទីក្រុងតេអេរ៉ង់ បានរៀបចំគម្រោងវាយប្រហារដោយដុតយ៉ាងហោចណាស់ចំនួន ២លើក ដែលជាសកម្មភាពប្រឆាំងនឹងជនជាតិជ្វីហ្វ នៅក្នុងប្រទេសនេះ។

ស្ថានីយ៍ទូរទស្សន៍ក្នុងស្រុក Network Seven និង Network Nine បានសួរទៅកាន់ឯកអគ្គរដ្ឋទូត លោក Ahmad Sadeghi នៅពេលលោកធ្វើដំណើរទៅកាន់អាកាសយានដ្ឋាន ក្នុងទីក្រុងស៊ីដនី។

លោក Albanese បានកាត់ផ្តាច់ទំនាក់ទំនងការទូតជាមួយអ៊ីរ៉ង់ នៅថ្ងៃអង្គារសប្ដាហ៍នេះ បន្ទាប់ពីមានការប្រកាសថា មន្ត្រីចារកម្មអូស្ត្រាលី បានសន្និដ្ឋានថា អ៊ីរ៉ង់បានដឹកនាំការវាយប្រហារដោយដុត នៅផ្ទះបាយ Lewis Continental ដែលជាក្រុមហ៊ុនអាហារជនជាតិជ្វីហ្វ នៅទីក្រុងស៊ីដនី ក្នុងខែតុលា ឆ្នាំ២០២៤ និងនៅវិហារជនជាតិជ្វីហ្វ Adass Israel Synagogue នៅទីក្រុងមែលប៊ន ២ខែក្រោយមក។

លោក Albanese បាននិយាយថា រដ្ឋាភិបាលអូស្ត្រាលី បានប្រាប់លោក Sadeghi ថា រូបលោកនឹងត្រូវបណ្តេញចេញក្នុងពេលឆាប់ៗនេះ មុនពេលធ្វើការចោទប្រកាន់ជាសាធារណៈ។

គួរបញ្ជាក់ថា មានការកើនឡើងយ៉ាងខ្លាំងនូវឧប្បត្តិហេតុប្រឆាំងជនជាតិជ្វីហ្វ នៅក្នុងទីក្រុងស៊ីដនី និងមែលប៊ន គិតចាប់តាំងពីសង្រ្គាមអ៊ីស្រាអែល និងក្រុមហាម៉ាស បានចាប់ផ្តើមនៅឆ្នាំ២០២៣ ហើយអាជ្ញាធរអូស្ត្រាលី បានប្រាប់ឲ្យដឹងនៅមុនថា ពួកគេសង្ស័យថា តួអង្គបរទេសកំពុងបង់ប្រាក់ឲ្យឧក្រិដ្ឋជន ក្នុងស្រុក ដើម្បីជួលឲ្យធ្វើការវាយប្រហារនៅក្នុងប្រទេស៕