អ្នកការទូតអឺរ៉ុប ២រូប បានប្រាប់ឲ្យដឹងថា ចក្រភពអង់គ្លេស បារាំង និងអាល្លឺម៉ង់ នឹងចាប់ផ្តើមដំណើរការដាក់ទណ្ឌកម្មឡើងវិញរបស់អង្គការសហប្រជាជាតិ (UN) លើអ៊ីរ៉ង់ នៅឯក្រុមប្រឹក្សាសន្តិសុខអង្គការសហប្រជាជាតិ នាថ្ងៃព្រហស្បតិ៍ (ទី២៨ ខែសីហា) នេះ។

ប្រទេសទាំង៣ ដែលត្រូវបានគេស្គាល់ថា E3 បានជួបពិភាក្សាជាមួយអ៊ីរ៉ង់ កាលពីថ្ងៃទី២៦ ខែសីហា ដើម្បីព្យាយាមស្តារឡើងវិញនូវទំនាក់ទំនងការទូត ជុំវិញកម្មវិធីនុយក្លេអ៊ែរ មុនពេលប្រទេសទាំងនោះលែងមានឱកាសនៅពាក់កណ្តាលខែតុលា ក្នុងការដាក់ទណ្ឌកម្មឡើងវិញលើទីក្រុងតេអេរ៉ង់ ដែលត្រូវបានលុបចោលក្រោមកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយមហាអំណាចពិភពលោក។

តែកិច្ចពិភាក្សាទាំងនោះមិនបានផ្តល់នូវការសន្យាជាក់ស្តែងគ្រប់គ្រាន់ពីប្រទេសអ៊ីរ៉ង់ឡើយ។ ហើយប្រភពការទូតបានបញ្ជាក់ថា ឥឡូវនេះ E3 បានសម្រេចចិត្តបង្កើតឡើងវិញនូវអ្វីដែលគេហៅថា ការអនុវត្តឡើងវិញដោយស្វ័យប្រវត្តិនូវទណ្ឌកម្មរបស់ UN ជុំវិញការចោទប្រកាន់ ដែលថា អ៊ីរ៉ង់បានរំលោភលើកិច្ចព្រមព្រៀងឆ្នាំ២០១៥ ដែលមានគោលបំណងទប់ស្កាត់ទីក្រុងតេអេរ៉ង់កុំឲ្យអភិវឌ្ឍអាវុធនុយក្លេអ៊ែរ។

E3 ដែលរដ្ឋមន្ត្រីរបស់ខ្លួន បានជូនដំណឹងដល់រដ្ឋមន្ត្រីការបរទេសអាមេរិក លោក Marco Rubio អំពីការសម្រេចរបស់ពួកគេកាលពីថ្ងៃទី២៧ ខែសីហា នឹងផ្ញើលិខិតមួយច្បាប់ទៅក្រុមប្រឹក្សាសន្តិសុខអង្គការសហប្រជាជាតិ នៅយប់ថ្ងៃទី២៨ ខែសីហានេះ។ ប្រទេសទាំង៣ សង្ឃឹមថា ចំណាត់នេះនឹងជំរុញឲ្យទីក្រុងតេអេរ៉ង់ផ្តល់នូវការប្តេជ្ញាចិត្តលើកម្មវិធីនុយក្លេអ៊ែររបស់ខ្លួន ក្នុងរយៈពេល ៣០ថ្ងៃ ដែលនឹងបញ្ចុះបញ្ចូលពួកគេឲ្យពន្យារពេលមានវិធានការជាក់ស្តែង។

អ៊ីរ៉ង់ធ្លាប់បានព្រមានថា នឹងមាន «ការឆ្លើយតបយ៉ាងតឹងរ៉ឹង» ប្រសិនបើទណ្ឌកម្មត្រូវបានដាក់ឡើងវិញ។ កិច្ចពិភាក្សា រវាង E3 និងអ៊ីរ៉ង់ មានភាពតានតឹងខ្លាំង ខណៈដែលទីក្រុងតេអេរ៉ង់ ខឹងសម្បាចំពោះការទម្លាក់គ្រាប់បែក កាលពីខែមិថុនា លើរោងចក្រនុយក្លេអ៊ែររបស់ខ្លួនពីសំណាក់សហរដ្ឋអាមេរិក និងអ៊ីស្រាអែល៕