ប្រទេសចិន បានចំណាយប្រាក់ ២១ពាន់លានដុល្លារអាមេរិក លើសមយុទ្ធយោធានៅច្រកសមុទ្រតៃវ៉ាន់ សមុទ្រចិនខាងកើតនិងខាងត្បូង ព្រមទាំងតំបន់ប៉ាស៊ីហ្វិកខាងលិច កាលពីឆ្នាំ២០២៤ ដែលខ្ពស់ជាងជិត ៤០% ធៀបនឹងឆ្នាំ២០២៣ នេះបើយោងតាមការប៉ាន់ប្រមាណរបស់រដ្ឋាភិបាលកោះតៃវ៉ាន់ ផ្អែកលើទិន្នន័យតាមដានយន្តហោះ និងនាវារបស់ខ្លួន និងការគណនាលើថ្លៃប្រេង និងការចំណាយផ្សេងទៀត។

ការស្រាវជ្រាវផ្ទៃក្នុងដោយកងកម្លាំងប្រដាប់អាវុធកោះតៃវ៉ាន់នេះ ត្រូវពិនិត្យដោយសារព័ត៌មានរ៉យទ័រ និងបញ្ជាក់ដោយមន្ត្រីកោះតៃវ៉ាន់ចំនួន ៤នាក់ ដែលផ្តល់នូវសេចក្ដីលម្អិតដ៏កម្រនៃទីតាំងប៉ាន់ស្មានជាក់លាក់បែបនេះ ក្នុងការចំណាយលើវិស័យការពារជាតិរបស់ចិន ខណៈទីក្រុងប៉េកាំង បន្តពង្រីកផ្លូវយោធា និងវិសាលភាពនៃសមយុទ្ធរបស់ខ្លួន ដែលបង្កក្ដីបារម្ភក្នុងតំបន់ និងនៅទីក្រុងវ៉ាស៊ីនតោន។

ប្រទេសចិន បានដាក់ថវិកាចំនួន ១,៦៧ សែនកោដិយ័ន (ពោលគឺ ២៣៣,៤៧ ពាន់លានដុល្លារអាមេរិក) ក្នុងការចំណាយវិស័យការពារជាតិសម្រាប់ឆ្នាំមុន ប៉ុន្តែអ្នកការទូតជឿយ៉ាងទូលំទូលាយថា ចំនួននេះទាបជាងរបាយការណ៍ពិត ខណៈចិន មិនផ្តល់ការវិភាគថាប្រាក់ទាំងនោះត្រូវចំណាយដូចម្ដេចឡើយ។

ទាំងក្រសួងការពារជាតិចិន និងការិយាល័យកិច្ចការតៃវ៉ាន់របស់ចិន មិនបានឆ្លើយតបទៅនឹងសំណើអត្ថាធិប្បាយលើរបាយការណ៍នេះទេ។ ប្រទេសចិន ដែលចាត់ទុកកោះតៃវ៉ាន់ជាទឹកដីរបស់ខ្លួន បាននិយាយម្តងហើយម្តងទៀតថា ការចំណាយយោធារបស់ខ្លួន មានតម្លាភាពខ្លាំងណាស់ និងមិនមានការគំរាមកំហែងអ្វីឡើយ៕