អង្គការសហប្រជាជាតិបានរាយការណ៍ថា បច្ចុប្បន្ននេះមានកុមារប្រហែលពាក់កណ្តាលក្នុងសមាជិករបស់ក្រុមជនអន្ធពាលនៅប្រទេសហៃទី ខណៈអំពើហិង្សា និងអស្ថិរភាពនយោបាយនិងសេដ្ឋកិច្ច បន្តញាំញីប្រទេសនៅតំបន់សមុទ្រការ៉ាអ៊ីបមួយនេះ។

កាលពីថ្ងៃព្រហស្បតិ៍ ប្រធានមូលនិធិកុមាររបស់អង្គការសហប្រជាជាតិ(UNICEF) លោកស្រី Catherine Russell បានប្រកាសពីស្ថិតិដ៏ «គួរឱ្យព្រួយបារម្ភ» ខណៈលោកស្រី និងមន្ត្រីផ្សេងទៀតបានជំរុញឱ្យមានការគាំទ្របន្ថែមទៀតនៅក្នុងប្រទេសហៃទី។

លោកស្រី Russell បាននិយាយថា «យើងប៉ាន់ប្រមាណថាកុមារបច្ចុប្បន្នមានចំនួន៥០ភាគរយនៃសមាជិកក្រុមប្រដាប់អាវុធដ៏សកម្មនាពេលបច្ចុប្បន្ននេះ»។ «កុមារត្រូវបានបង្ខំឱ្យចូលរួមក្នុងតួនាទីប្រយុទ្ធ ចូលរួមដោយផ្ទាល់នៅក្នុងការប្រឈមមុខដាក់គ្នាដោយអាវុធ។ កុមារផ្សេងទៀតត្រូវបានប្រើប្រាស់ជាអ្នកនាំសំបុត្រ អ្នកឃ្លាំមើល អ្នកកាន់អាវុធ ឬត្រូវបានកេងប្រវ័ញ្ចសម្រាប់ពលកម្មក្នុងស្រុក»។

លោកស្រីបាននិយាយបន្ថែមថា ចំនួនអ្នកជ្រើសរើសកុមារ ទំនងជាកើនឡើងយ៉ាងឆាប់រហ័ស។

នោះស្របពេលនឹងការកើនឡើងនៃការរំលោភសិទ្ធិមនុស្សដែលត្រូវបានប្រព្រឹត្តលើកុមារនៅក្នុងប្រទេសហៃទី។ នៅឆ្នាំ២០២៤ អង្គការសហប្រជាជាតិបានរាយការណ៍ថាមានការរំលោភបំពានធ្ងន់ធ្ងរជាង ២.០០០ករណីប្រឆាំងនឹងអនីតិជន។