អង្គការ Save the Children បានព្រមានថា កុមាររាប់លាននាក់នៅទូទាំងប្រទេសអាហ្វ្រិកចំនួនបួន អាចស្លាប់ដោយសារកង្វះអាហារូបត្ថម្ភក្នុងរយៈពេល៣ខែបន្ទាប់នេះ ខណៈការផ្គត់ផ្គង់ស្បៀងសង្គ្រោះបន្ទាន់បានធ្លាក់ចុះដោយសារលទ្ធផលនៃការកាត់ជំនួយអន្តរជាតិ។

អង្គការ Save the Children បាននិយាយកាលពីថ្ងៃព្រហស្បតិ៍ថា ប្រទេសនីហ្សេរីយ៉ា កេនយ៉ា សូម៉ាលី និងប្រទេសស៊ូដង់ខាងត្បូង ត្រូវបានគេរំពឹងថានឹងអស់នូវអ្វីដែលគេហៅថា «អាហារសម្រាប់សុខភាពដែលត្រៀមទុក» ជាប្រភេទអាហារបំប៉នមានអាយុកាលយូរ និងមិនចាំបាច់ត្រូវការទូរទឹកកក។

ក្រុមជំនួយមនុស្សធម៌បាននិយាយថា នៅក្នុងប្រទេសនីហ្សេរីយ៉ាតែមួយ ជីវិតរបស់កុមារអាយុក្រោម៥ឆ្នាំចំនួន៣,៥លាននាក់ដែលទទួលរងពីកង្វះអាហារូបត្ថម្ភធ្ងន់ធ្ងរនឹងស្ថិតក្រោមការគំរាមកំហែងដោយគ្មានលទ្ធភាពទទួលបានការព្យាបាល និងជំនួយអាហារូបត្ថម្ភ។

ក្រុមជំនួយនិយាយថា មនុស្សជាច្រើននឹងមិនទទួលបានការគាំទ្រដែលពួកគេត្រូវការទេ ប៉ុន្តែយើងនឹងជួយសង្គ្រោះជីវិតមនុស្សឱ្យបានច្រើនតាមតែអាចធ្វើទៅបានជាមួយនឹងធនធានដែលយើងផ្តល់ឱ្យ។