និស្សិតឥណ្ឌូនេស៊ី បាននិយាយថា ពួកគេនឹងចេញតវ៉ានៅទីស្នាក់ការនគរបាលក្រុងហ្សាការតា នៅថ្ងៃសុក្រ (២៩ សីហា) នេះ បន្ទាប់ពីអ្នកជិះម៉ូតូម្នាក់បានស្លាប់នៅពេលត្រូវរថយន្តនគរបាលបុក អំឡុងការប៉ះទង្គិចដោយហិង្សាជុំវិញបាតុកម្មមួយនៅខាងក្រៅសភាកាលពីថ្ងៃព្រហស្បតិ៍។

លោក Muzammil Ihsan ប្រធានសហជីពនិស្សិតដ៏ធំបំផុតរបស់ឥណ្ឌូនេស៊ី បានប្រាប់សារព័ត៌មានរ៉យទ័រថា ក្រុមនិស្សិតនឹងតវ៉ាប្រឆាំងអំពើហិង្សារបស់នគរបាលនៅរសៀលថ្ងៃសុក្រនេះ ហើយលោករំពឹងថា ក្រុមនិស្សិតផ្សេងទៀតនឹងចូលរួម។

កាលពីថ្ងៃព្រហស្បតិ៍ ក្រុមបាតុករបានតវ៉ាបញ្ហាមួយចំនួន រួមមានប្រាក់ខែរបស់សមាជិកសភា មូលនិធិអប់រំ និងកម្មវិធីអាហារសាលារបស់រដ្ឋាភិបាល។ ខណៈការតវ៉ានៅតែបន្តដល់ពេលយប់ ប្រព័ន្ធផ្សព្វផ្សាយក្នុងស្រុករាយការណ៍ថា នគរបាលកុបកម្មប្រើឧស្ម័នបង្ហូរទឹកភ្នែក និងកាណុងបាញ់ទឹកដើម្បីព្យាយាមបំបែកហ្វូងមនុស្ស។

លោក Asep Edi Suheri ប្រមុខនគរបាលរដ្ឋធានីហ្សាការតា និយាយថា អំឡុងពេលប៉ះទង្គិចគ្នានោះ រថយន្តនគរបាលពាសដែកមួយគ្រឿង បានជ្រុលទៅបុក និងសម្លាប់អ្នកជិះម៉ូតូម្នាក់។ សមាគមអ្នកជិះម៉ូតូ និយាយថា បុរសដែលស្លាប់នោះមិនពាក់ព័ន្ធនឹងការតវ៉ាទេ ហើយក្រោយមក ប្រព័ន្ធផ្សព្វផ្សាយក្នុងស្រុករាយការណ៍ថា ក្រុមដែលដឹកនាំដោយអ្នកបើកម៉ូតូ បានចេញតវ៉ានៅមុខទីស្នាក់ការនគរបាលកុបកម្ម កាលពីយប់ថ្ងៃព្រហស្បតិ៍៕