​វាយ​កូន​បាល់៖ ​កីឡាករ​វាយ​កូន​បាល់​ស្កុ​ត​ឡេ​ន​អតីត​លំដាប់​លេខ ១ ពិភពលោក Andy Murray បាន​ធ្លាក់​ចេញពី​ការប្រកួត Grand Slam, Australian Open ហើយ​ត្រឹម​ជុំ​ទី២ ប៉ុណ្ណោះ​ក្រោយ​ចាញ់​កីឡាករ​ជប៉ុន Taro Daniel ដែលមាន​លំដាប់ថ្នាក់​លេខ ១២០ ពិភពលោក​។ ​​នេះ​ជាការ​ប្រកួត​ដែលមាន​ទំរង់​លេង​ធ្លាក់ចុះ​ខ្លាំង​សំរាប់ Andy Murray បើ​ប្រៀបធៀប​នឹង​ជ័យជំនះ​កាលពី​ជុំ​ទី១ លើ​កីឡាករ Nikoloz Basilashvili​។

​កីឡាករ​វ័យ ៣៤ឆ្នាំ​រូបនេះ​មិនអាច​តដៃ​បាន​សូម្បី​តែមួយ​សិត​ខណៈ Taro Daniel យកឈ្នះ​បី​សិត​ផ្ទួនៗ ៦-៤, ៦-៤ និង ៦-៤​។ បរាជ័យ​របស់ Andy Murray មានន័យថា​ ចក្រភព​អង់គ្លេស​នៅសល់តែ​កីឡាករ Dan Evans ប៉ុណ្ណោះ​នៅ Australian Open ឆ្នាំនេះ​។ ​​ងាក​មក​កីឡាករ​ក្រិ​ក Stefanos Tsitsipas មិនមាន​បញ្ហា​ទេ​ដោយបាន​បន្តដំណើរ​ទៅ​ជុំ​ទី៣ បន្តទៀត​ក្រោយ​យកឈ្នះ​កីឡាករ​អា​ហ្ស​ង់​ទីន Sebastian Baez លទ្ធផល ៣-១ ពិន្ទុ ៧-៦(៧-១), ៦-៧(៥-៧), ៦-៣ និង ៦-៤​។ ​ការប្រកួត​ដែល​ចំណាយពេល​អស់ ៣ម៉ោង ២២នាទី Stefanos Tsitsipas ដែល​ធ្លាប់​មានមុខ​នៅ​វគ្គ​ពាក់កណ្តាល​ផ្តាច់ព្រ័ត្រ Australian Open នេះ ២លើក​នឹង​បន្ត​ជួប​ជាមួយ​កីឡាករ​ប៊ុល​ហ្ការី Grigor Dimitrov​។​

​​ចំណែក​កីឡាករ​លំដាប់​ទី៥ Andrey Rublev បាន​បន្តដំណើរ​ទៅ​ជុំ​ទី៣ ផងដែរ​ក្រោយ​យកឈ្នះ​កីឡាករ​លី​ទុយ​អា​នី Ricardas Berankis បី​សិត​ផ្ទួនៗ ៦-៤, ៦-២ និង ៦-០​។​ ​កីឡាករ​វ័យ ២៤ឆ្នាំ​រូបនេះ​នឹង​បន្តទៅ​ជុំ​ទី៣ ជួប​ជាមួយ​កីឡាករ​ក្រូ​អាស៊ី Marin Cilic ដែល​បាន​យកឈ្នះ​កីឡាករ Norbert Gombos​។ ​ជាមួយគ្នា​នោះដែរ​កីឡាករ​ម្ចាស់ផ្ទះ​អូស្ត្រាលី Alex de Minaur បាន​បន្តដំណើរ​ទៅមុខ​ផងដែរ​ក្រោយ​យកឈ្នះ​លើកីឡាករ​ប៉ូឡូញ Kamil Majchrzak ៦-៤, ៦-៤ និង ៦-៤៕

​អត្ថបទ​៖​នាង សុភា​វុ​ធ