អង្គការ Save the Children បាននិយាយថា យ៉ាងហោចណាស់ប្រទេសចំនួន ៤នៅទ្វីបអាហ្រ្វិក នឹងអស់អាហារសង្គ្រោះពិសេសសម្រាប់កុមារ ដែលខ្វះអាហារូបត្ថម្ភយ៉ាងធ្ងន់ធ្ងរ ក្នុងរយៈពេលបីខែខាងមុខ ដោយសារកង្វះខាតដែលបណ្តាលមកពីការកាត់បន្ថយជំនួយ។

ក្រុមជំនួយដែលមានមូលដ្ឋាននៅចក្រភពអង់គ្លេស បាននិយាយថា ការផ្គត់ផ្គង់មានកម្រិតទាបយ៉ាងខ្លាំងបំផុត នៅក្នុងប្រទេសនីហ្សេរីយ៉ា កេនយ៉ា សូម៉ាលី និងស៊ូដង់ខាងត្បូងដែលមាននំបុ័ងក្រៀមមានថាមពលខ្ពស់ អាហារម្សៅធ្វើពីសណ្តែកដី Plumpy’Nut និងការព្យាបាលផ្សេងទៀត ដែលត្រូវដឹងថា ជាអាហារព្យាបាលដែលត្រៀមរួចជាស្រេច(RUTF)។

លោក Yvonne Arunga នាយកប្រចាំតំបន់នៃអង្គការសប្បុរសធម៌សម្រាប់អាហ្វ្រិកខាងកើត និងខាងត្បូង បាននិយាយថា៖«នៅពេលដែលភាពអត់ឃ្លានជាសកល កំពុងកើនឡើងយ៉ាងខ្លាំងនោះ មូលនិធិដែលអាចជួយសង្គ្រោះជីវិតកុមារ បានធ្លាក់ចុះ ដោយសារតែការកាត់បន្ថយជំនួយនាពេលថ្មីៗនេះ»។

អង្គការ Save the Children មិនដាក់ឈ្មោះម្ចាស់ជំនួយជាក់លាក់ ឬការកាត់បន្ថយមូលនិធិ នៅក្នុងសេចក្តីថ្លែងការណ៍របស់ខ្លួនទេ។ សហរដ្ឋអាមេរិក បានកាត់បន្ថយជំនួយមនុស្សធម៌ នៅឆ្នាំនេះ ហើយមហាអំណាចលោកខាងលិចផ្សេងទៀត ក៏បាននិងកំពុងកាត់បន្ថយការផ្តល់មូលនិធិផងដែរ ដែលជាផ្នែកនៃការកាត់បន្ថយជំនួយរយៈពេលវែង។

Save the Children បាននិយាយថា គ្លីនិកមួយចំនួននៅក្នុងប្រទេសអាហ្រ្វិកទាំង ៤ បានងាកទៅរកការព្យាបាលដែលមិនសូវមានប្រសិទ្ធភាពចំពោះកុមារដែលខ្វះអាហារូបត្ថម្ភ។