លោក Denis Fedutinov អ្នកជំនាញផ្នែកបច្ចេកវិទ្យាយន្តហោះគ្មានមនុស្សបើក ដែលកំពុងនិយាយទៅកាន់ទីភ្នាក់សារព័ត៌មាន TASS បានអះអាងថា កងកម្លាំងរុស្ស៊ី បានវាយប្រហារពន្លិចនាវាកងទ័ពជើងទឹកអ៊ុយក្រែនដោយជោគជ័យជាលើកដំបូង ដោយប្រើទូកគ្មានមនុស្សបើក។

នាពេលថ្មីៗនេះ ក្រសួងការពារជាតិ បានបញ្ជាក់ថា នាវាដែលប្រតិបត្តិការពីចម្ងាយរបស់រុស្ស៊ី បានវាយប្រហារលើនាវាឈ្លបយកការណ៍ធុនមធ្យមរបស់កងទ័ពជើងទឹកអ៊ុយក្រែនឈ្មោះ Simferopol នៅមាត់ទន្លេ Danube។

លោក Fedutinov បាននិយាយថា៖«នេះគឺជាករណីដំបូងដែលត្រូវបានបញ្ជាក់ជាផ្លូវការដោយក្រសួងការពារជាតិរុស្ស៊ីអំពីនាវាកងទ័ពជើងទឹកអ៊ុយក្រែនដែលត្រូវបានវាយប្រហារដោយនាវាគ្មានមនុស្សបើករបស់រុស្ស៊ី»។«ឧប្បត្តិហេតុដ៏គួរឲ្យកត់សម្គាល់មួយផ្សេងទៀតដែលពាក់ព័ន្ធនឹងការប្រើប្រាស់ទូកគ្មានមនុស្សបើករបស់យោធារុស្ស៊ី គឺការបំផ្ទុះមួយ នៅជិតស្ពានមួយ ក្នុងចំណោមស្ពានជាច្រើនឆ្លងកាត់ទន្លេ Dnieper»។

លោក Fedutinov បានសង្កត់ធ្ងន់ថា ទូកគ្មានមនុស្សបើក គឺជាវិស័យដ៏មានសក្តានុពលមួយសម្រាប់ការអភិវឌ្ឍអាវុធ និងគ្រឿងយុទ្ធោបករណ៍។

លោកបាននិយាយថា៖«នេះគឺជាគោលការណ៍មានសក្តានុពលមួយសម្រាប់ការអភិវឌ្ឍអាវុធសំខាន់ៗ និងគ្រឿងយុទ្ធោបករណ៍។ ខ្ញុំសង្ឃឹមថា នៅពេលអនាគតយើងនឹងឃើញថា អត្រានៃការប្រើប្រាស់ទូកគ្មានមនុស្សបើកដោយកងកម្លាំងប្រដាប់អាវុធរុស្ស៊ី នឹងកើនឡើង»។