នាយករដ្ឋមន្រ្តីឥណ្ឌាលោក Narendra Modi បានធ្វើដំណើរទៅដល់ទីក្រុងតូក្យូនាថ្ងៃសុក្រនេះ សម្រាប់ជំនួបកំពូលប្រចាំឆ្នាំ ជាទីដែលគេរំពឹងថា លោកនឹងស្វែងរកទំនាក់ទំនងយុទ្ធសាស្រ្តស៊ីជម្រៅជាងមុន ស្របពេលដែលប្រទេសរបស់លោកព្យាយាមទប់លំនឹងខ្លួនឯង ដោយសារការដំឡើងតម្លៃពន្ធរបស់ប្រធានាធិបតីសហរដ្ឋអាមេរិកលោក Donald Trump ។

 ក្រុមមន្រ្តីនិយាយថា ដំណើរទស្សនកិច្ចរយៈពេល ២ថ្ងៃរបស់លោក Modi ត្រូវបានគេរំពឹងទុកថានឹងរួមបញ្ចូលកិច្ចប្រជុំលើភាពជាដៃគូរ៉ែសំខាន់ ហើយនិងការវិនិយោគទុនរបស់ចិនលើហេដ្ឋារចនាសម្ព័ន្ធ តម្លៃខ្ពស់នៅក្នុងប្រទេសឥណ្ឌា ។

 ដំណើរទស្សនកិច្ចរបស់មេដឹកនាំឥណ្ឌារូបនេះ មកកាន់ប្រទេសជប៉ុននៅថ្ងៃសុក្រ និងថ្ងៃសៅរ៍ ទទួលបានសារៈសំខាន់ជាច្រើន ពេលដែលប្រទេសទាំង ២ ស្ថិតក្នុងក្រុមប្រទេស Quad ជាមួយអូស្រ្តាលី និងសហរដ្ឋអាមេរិក ដែលព្យាយាមទប់ទល់ឥទ្ធិពលកើនឡើងរបស់ចិននៅក្នុងតំបន់ឥណ្ឌូ-ប៉ាស៊ីហ្វិក ។

 បើទោះបីជាមានទំនាក់ទំនងជាប់គាំងជាមួយទីក្រុងវ៉ាស៊ីនតោនយ៉ាងណាក្តី ឥណ្ឌានិយាយថា លោក Modi និងនាយករដ្ឋមន្រ្តីជប៉ុនលោក Shigeru Ishiba នឹងពិភាក្សាលើការពង្រីកកិច្ចសហប្រតិបត្តិការក្នុងក្របខណ្ឌក្រុមសន្តិសុខក្នុងតំបន់ ៕