ប្រភពរដ្ឋាភិបាល កាលពីថ្ងៃព្រហស្បតិ៍ (ទី២៨ ខែសីហា) បានប្រាប់ឲ្យដឹងថា ប្រទេសប្រេស៊ីលកំពុងពិចារណាពីការមានវិធានការពាណិជ្ជកម្មសងសឹក ចំពោះសហរដ្ឋអាមេរិក ក្នុងនោះរួមទាំងការតបទៅនឹងការដំឡើងពន្ធផងដែរ បន្ទាប់ពីលោកប្រធានាធិបតី Donald Trump បានដាក់អត្រាពន្ធ ៥០ភាគរយលើការនាំចូលរបស់ប្រេស៊ីលជាច្រើនប្រភេទ។

ប្រភពរដ្ឋាភិបាលចំនួន ២ បាននិយាយថា លោកប្រធានាធិបតី Luiz Inacio Lula da Silva (លោក Lula) បានផ្តល់ការយល់ព្រមដល់ការសិក្សា អំពីវិធានការសងសឹក ពោលគឺប្រសិនបើមាននោះ ប្រេស៊ីលអាចអនុវត្តការដាក់ទណ្ឌកម្មដែលដាក់ដោយលោក Trump ជុំវិញការកាត់ទោសធ្វើរដ្ឋប្រហារលើសម្ព័ន្ធមិត្តរបស់លោក គឺលោក Jair Bolsonaro ។

ក្រសួងពាណិជ្ជកម្ម និងឧស្សាហកម្ម នឹងមានពេល ៣០ថ្ងៃ ដើម្បីកំណត់ថា តើពន្ធរបស់សហរដ្ឋអាមេរិកគ្របដណ្ដប់ដោយច្បាប់ស្តីពីសមភាពសេដ្ឋកិច្ច នាពេលថ្មីៗនេះដែរ ឬទេ។

ប្រភពការទូតមួយ បានប្រាប់ថា ប្រសិនបើពួកគេធ្វើដូច្នេះ ក្រុមអ្នកជំនាញ នឹងស្នើវិធានការតបត ដែលអាចរួមបញ្ចូលពន្ធបដិការផងដែរ។ ប្រភពនោះបានបន្ថែមថា រដ្ឋាភិបាលប្រេស៊ីល នឹងជូនដំណឹងជាផ្លូវការដល់សហរដ្ឋអាមេរិក នៅថ្ងៃសុក្រ អំពីការសម្រេចចិត្តរបស់ខ្លួន ក្នុងការពិចារណាពីលទ្ធភាពសងសឹក។ តែយ៉ាងក្ដី ប្រភពនេះបានបញ្ជាក់ថា៖ «ឱកាស ដើម្បីឲ្យមានការពិគ្រោះយោបល់ការទូត នៅតែបើកចំហដដែល»។

ច្បាប់ស្តីពីសមភាពសេដ្ឋកិច្ច ដែលទទួលបានការអនុម័តកាលពីខែមេសា អនុញ្ញាតឲ្យរដ្ឋាភិបាលមាន «ចំណាត់ការតបត» ប្រឆាំងនឹងប្រទេសដែលចាត់វិធានការជាឯកតោភាគី ធ្វើប៉ះពាល់ដល់ការប្រកួតប្រជែងរបស់ប្រទេសប្រេស៊ីល។ វិធានការនេះ រួមមានការផ្អាកសម្បទានពាណិជ្ជកម្ម ការវិនិយោគ ឬកិច្ចព្រមព្រៀងកម្មសិទ្ធិបញ្ញា៕