ត្រឹមតែប៉ុន្មានថ្ងៃបន្ទាប់ពីប្រធានាធិបតីអាមេរិក លោក Donald Trump បាននិយាយថា លោកចង់ជួបជាមួយលោក Kim Jong Un ទីក្រុងព្យុងយ៉ាង បានឆ្លើយតបតាមវិធីសាស្ត្រផ្ទាល់របស់ខ្លួន ដោយការប្រកាស អំពីការធ្វើដំណើររបស់មេដឹកនាំកូរ៉េខាងជើងរូបនេះទៅចូលរួមជាមួយប្រធានាធិបតីរុស្ស៊ី លោក Vladimir Putin នៅឯព្រឹត្តិការណ៍ព្យុហយាត្រាយោធារបស់ប្រទេសចិន។

ការចូលរួមរបស់លោក Kim នៅឯពិធីប្រារព្ធទិវាជ័យជម្នះ ៣ កញ្ញា ដោយត្រូវឈររួមជាមួយបណ្ដាមេដឹកនាំដ៏មានឥទ្ធិពលបំផុតមួយចំនួនរបស់ពិភពលោក នឹងផ្ញើសារយ៉ាងច្បាស់ទៅកាន់សហរដ្ឋអាមេរិក និងសម្ព័ន្ធមិត្តរបស់ខ្លួនថា នេះមិនមែនជាប្រទេសកូរ៉េខាងជើងដែលធ្លាប់បានឃើញ កាលពីប៉ុន្មានឆ្នាំមុននោះទេ ពោលគឺនៅពេលដែលលោក Trump និងលោក Kim បានជួបគ្នាដោយផ្ទាល់ សម្រាប់កិច្ចពិភាក្សានុយក្លេអ៊ែរ។

សម្រាប់លោក Kim ដំណើរទស្សនកិច្ចនេះ នឹងបង្ហាញពីការចាប់ផ្តើមដំបូងរបស់លោក នៅលើឆាកការទូតពហុភាគី ចាប់តាំងពីលោកឡើងកាន់អំណាចកាលពី ១៤ឆ្នាំមុន ដោយបញ្ជាក់ពីការមានទំនុកចិត្តរបស់មេដឹកនារូបនេះ ដែលគាំទ្រដោយវឌ្ឍនភាពយ៉ាងឆាប់រហ័សនៅក្នុងភាពជាដៃគូជាមួយរុស្ស៊ី និងការបង្កើនជាលំដាប់នូវឃ្លាំងអាវុធនុយក្លេអ៊ែររបស់លោក។

គួរបញ្ជាក់ថា លើកចុងក្រោយដែលមេដឹកនាំកូរ៉េខាងជើងបានបង្ហាញវត្តមាននៅក្នុងព្រឹត្តិការណ៍ព្យុហយាត្រាយោធា ក្នុងប្រទេសចិន គឺនៅឆ្នាំ១៩៥៩។

លោក Victor Cha ប្រធាននៅមជ្ឈមណ្ឌលសិក្សាយុទ្ធសាស្ត្រ និងអន្តរជាតិ សម្រាប់ការសិក្សាពីកូរ៉េ បាននិយាយថា៖ «ប្រធានាធិបតីចិន លោក Xi Jinping នឹងមើលឃើញថា នេះជាឱកាសមួយ ដើម្បីភ្ជាប់ទំនាក់ទំនងឡើងវិញជាមួយលោក Kim បន្ទាប់ពីរក្សាគម្លាតពីគ្នាយ៉ាងយូរ»៕