ការពិភាក្សាជាមួយសេតវិមាន ក្នុងការអនុញ្ញាតឲ្យក្រុមហ៊ុនបន្ទះឈីប AI (បញ្ញាសិប្បនិម្មិត) របស់សហរដ្ឋអាមេរិក គឺ Nvidia លក់កំណែទាបនៃបន្ទះឈីប GPU កម្រិតខ្ពស់ជំនាន់ក្រោយរបស់ខ្លួន ទៅកាន់ប្រទេសចិន នឹងត្រូវចំណាយពេល។ នេះបើយោងតាមនាយកប្រតិបត្តិរបស់ Nvidia គឺលោក Jensen Huang ដែលបាននិយាយកាលពីថ្ងៃព្រហស្បតិ៍ (ទី២៨ ខែសីហា)។

អំឡុងកិច្ចសម្ភាសន៍ ក្នុងកម្មវិធីបណ្តាញអាជីវកម្មរបស់ប្រព័ន្ធផ្សព្វផ្សាយ Fox គឺកម្មវិធី «The Claman Countdown» នៅពេលត្រូវបានសួរ អំពីកិច្ចពិភាក្សាជាមួយសេតវិមាន ស្តីពីការលក់បន្ទះឈីប Blackwell ទៅចិន លោក Huang បានប្រាប់ថា ការពិភាក្សាបានចាប់ផ្តើមហើយ។

លោកបានបញ្ជាក់ថា៖ «ការជជែកពិភាក្សា នឹងចំណាយពេលបន្តិច ប៉ុន្តែលោកប្រធានាធិបតី (Donald) Trump យល់យ៉ាងច្បាស់ថា ការដែលពិភពលោកបង្កើត AI តាមបច្ចេកវិទ្យារបស់អាមេរិក ជួយឲ្យអាមេរិកឈ្នះការប្រណាំងប្រជែងផ្នែក AI»។

កាលពីដើមខែនេះ លោក Trump បានផ្តល់យោបល់ថា លោកអាចអនុញ្ញាតឲ្យក្រុមហ៊ុន Nvidia លក់បន្ទះឈីបកំណែទាប នៅក្នុងប្រទេសចិន ដោយកត់សម្គាល់ថា វានឹងមានសមត្ថភាពទាបពី ៣០ ទៅ ៥០ភាគរយជាងកំណែធម្មតា។

ការសម្រេចនោះកើតឡើងបើទោះបីជាមានការភ័យខ្លាចយ៉ាងខ្លាំង នៅក្នុងទីក្រុងវ៉ាស៊ីនតោន ដែលថា ចិនអាចប្រើប្រាស់សមត្ថភាព AI របស់សហរដ្ឋអាមេរិក ដើម្បីពង្រឹងកម្លាំងយោធារបស់ខ្លួន។ តែក្រុមអ្នកមាននិន្នាការប្រឆាំងចិន បារម្ភថា ការអនុញ្ញាតនេះ បើទោះជាត្រឹមបន្ទះឈីបមិនមានកម្រិតខ្ពស់ Blackwell ទៅកាន់ប្រទេសចិន អាចបើកឱកាសឲ្យទីក្រុងប៉េកាំងទទួលបានថាមពលកុំព្យូទ័រកម្រិតខ្ពស់បន្ថែមទៀតពីសហរដ្ឋអាមេរិក ខណៈដែលប្រទេសទាំង ២ កំពុងប្រជែងគ្នា ដើម្បីឧត្តមភាពបច្ចេកវិទ្យា៕