ក្រុមសមាជិកព្រឹទ្ធសភាជាន់ខ្ពស់របស់សហរដ្ឋអាមេរិកពីគណបក្សទាំង២ កាលពីថ្ងៃព្រហស្បតិ៍ (ទី២៨ ខែសីហា) បានអំពាវនាវឲ្យអ៊ីស្រាអែលបញ្ឈប់ការទម្លាក់គ្រាប់បែក នៅស៊ីរី និង «ទាញយកប្រយោជន៍ពីឱកាសនេះ» បន្ទាប់ពីពួកគេត្រលប់ពីដំណើរទស្សនកិច្ច នៅទីក្រុងដាម៉ាស។

គណៈប្រតិភូ រួមមានសមាជិកកម្រិតខ្ពស់ខាងគណបក្សប្រជាធិបតេយ្យនៃគណៈកម្មាធិការទំនាក់ទំនងការបរទេសព្រឹទ្ធសភា លោកស្រី Jeanne Shaheen ក៏ដូចជាសមាជិកព្រឹទ្ធសភាមកពីសាធារណរដ្ឋដ៏មានឥទ្ធិពល លោកស្រី Joni Ernst និងសមាជិកសភា Joe Wilson ដែលជាសហប្រធាននៃក្រុមផ្ដោតលើអ៊ីស្រាអែល។

លិខិតពីគណៈប្រតិភូនោះ បានសរសេររៀបរាប់ថា៖ «សារគឺច្បាស់លាស់ណាស់ នោះគឺថា ស៊ីរីត្រូវការឱកាស ដើម្បីសម្រេចបានជោគជ័យ និងដើម្បីឆ្លងកាត់ អំពើហិង្សា និងជម្លោះដែលបានលេបត្របាក់ប្រទេសអស់រយៈពេលជាង ១៤ ឆ្នាំមកហើយ។ ការវាយប្រហារដោយអស្ថិរភាពកាលពីយប់មិញ (ទី២៧ ខែសីហា) លើប្រទេសស៊ីរី ពីសំណាក់អ៊ីស្រាអែល ធ្វើឲ្យគោលដៅនោះកាន់តែលំបាកក្នុងការសម្រេចបាន»។

គួរបញ្ជាក់ថា បើយោងតាមទូរទស្សន៍រដ្ឋ បានឲ្យដឹងថា អ៊ីស្រាអែលបានទម្លាក់គ្រាប់បែកលើគោលដៅ នៅខាងក្រៅទីក្រុងដាម៉ាសជាច្រើនដង ក្នុងសប្តាហ៍នេះ ដោយបានសម្លាប់ទាហានស៊ីរីយ៉ាងហោចណាស់ ៦នាក់។ កាលពីយប់ថ្ងៃពុធ (ទី២៧ ខែសីហា) ការវាយប្រហាររបស់អ៊ីស្រាអែលបន្ថែមទៀត បានផ្តោតលើទីតាំងមួយទៀត នៅជិតរដ្ឋធានីរបស់ស៊ីរី។

អំឡុងដំណើរទស្សនកិច្ចនោះ គណៈប្រតិភូនៃសមាជិកសភាអាមេរិកនោះ បានជួបជាមួយប្រធានាធិបតីស៊ីរី លោក Ahmed al-Sharaa រដ្ឋមន្ត្រីគណៈរដ្ឋមន្ត្រី និងប្រជាជនស៊ីរី មកពីមជ្ឈដ្ឋាន និងសាសនាផ្សេងៗគ្នា៕