ប្រទេសអង់គ្លេស បារាំង និងអាល្លឺម៉ង់ កាលពីថ្ងៃព្រហស្បតិ៍ (ទី២៨ ខែសីហា) បានចាប់ផ្តើមដំណើរការរយៈពេល ៣០ថ្ងៃ ដើម្បីដាក់ទណ្ឌកម្មឡើងវិញរបស់អង្គការសហប្រជាជាតិ (UN) លើអ៊ីរ៉ង់ ជុំវិញកម្មវិធីនុយក្លេអ៊ែរដ៏ចម្រូងមចម្រាសរបស់ប្រទេសនេះ ដែលជាជំហានមួយទំនងជាធ្វើឲ្យមានភាពតានតឹង ពោលគឺ ២ខែបន្ទាប់ពីអ៊ីស្រាអែល និងសហរដ្ឋអាមេរិក បានទម្លាក់គ្រាប់បែកលើអ៊ីរ៉ង់។

មន្ត្រីជាន់ខ្ពស់អ៊ីរ៉ង់ម្នាក់បានចោទប្រកាន់ភ្លាមៗថា មហាអំណាចអឺរ៉ុបទាំង៣ ឬ E3 បានធ្វើឲ្យខូចដល់ការងារការទូត ហើយបានប្តេជ្ញាថា ទីក្រុងតេអេរ៉ង់នឹងមិនចុះញ៉ម ចំពោះការដាក់សម្ពាធ ជុំវិញចំណាត់ការរបស់ E3 ក្នុងការចាប់ផ្តើមនូវអ្វីដែលគេហៅថា «យន្តការដាក់ទណ្ឌកម្មឡើងវិញស្វ័យប្រវត្តិ»។

រដ្ឋមន្ត្រីការបរទេសអ៊ីរ៉ង់ លោក Abbas Araqchi ក៏បានបរិហារការសម្រេចចិត្តរបស់ E3 ដោយហៅវាថា «មិនសមហេតុផល ខុសច្បាប់ និងខ្វះមូលដ្ឋានច្បាប់»។

ដោយសង្កត់ធ្ងន់ថា ជំហររបស់អ៊ីរ៉ង់ នៅតែមានភាពរឹងមាំ ក្នុងការការពារសិទ្ធិស្របច្បាប់របស់ខ្លួន ក្រោមច្បាប់អន្តរជាតិ និងសន្ធិសញ្ញាមិនរីកសាយភាយ (NPT) លោក Araqchi បាននិយាយថា អ៊ីរ៉ង់នឹងឆ្លើយតបយ៉ាងសមស្រប ដើម្បីការពារសិទ្ធិ និងផលប្រយោជន៍ជាតិរបស់ខ្លួន។

ចំណែកអនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានព្រមានថា ប្រសិនបើការដាក់ទណ្ឌកម្មស្វ័យប្រវត្តិនោះជោគជ័យ កិច្ចសហប្រតិបត្តិការរបស់អ៊ីរ៉ង់ជាមួយទីភ្នាក់ងារថាមពលបរមាណូអន្តរជាតិ (IAEA) នឹងបញ្ចប់។

គួរបញ្ជាក់ថា ចាប់តាំងពីអ៊ីស្រាអែល និងសហរដ្ឋអាមេរិកបានទម្លាក់គ្រាប់បែកលើទីតាំងដំឡើងនុយក្លេអ៊ែររបស់ខ្លួន កាលពីពាក់កណ្តាលខែមិថុនា អ៊ីរ៉ង់ និង E3 បានបើកកិច្ចចរចាជាច្រើនលើក ក្នុងគោលបំណងព្រមព្រៀងបោះបង់យន្តការដាក់ទណ្ឌកម្មឡើងវិញស្វ័យប្រវត្តិ។ ប៉ុន្តែ E3 បានចាត់ទុកថា កិច្ចពិភាក្សា នៅទីក្រុងហ្សឺណែវ ប្រទេសស្វីស កាលពីថ្ងៃអង្គារដើមសប្ដាហ៍នេះ មិនទទួលបានសញ្ញាគ្រប់គ្រាន់នៃការត្រៀមខ្លួន សម្រាប់កិច្ចព្រមព្រៀងថ្មី ពីសំណាក់អ៊ីរ៉ង់ឡើយ៕