អ្នកនាំពាក្យរដ្ឋាភិបាលអង់គ្លេស បាននិយាយនៅថ្ងៃសុក្រនេះថា តំណាងរដ្ឋាភិបាលអ៊ីស្រាអែល នឹងមិនត្រូវបានអញ្ជើញឲ្យចូលរួមការតាំងពិព័រណ៍អាវុធដ៏ធំនៅទីក្រុងឡុងដ៍ នៅខែក្រោយនេះទេ ចំពេលទំនាក់ទំនងការទូតរវាងអង់គ្លេស និងអ៊ីស្រាអែល កាន់តែអាក្រក់ឡើងៗ ជុំវិញជម្លោះនៅតំបន់ហ្កាហ្សា។

សេចក្តីថ្លែងការណ៍របស់ក្រសួងការពារជាតិដែលបានផ្ញើតាមអ៊ីមែលទៅសារព័ត៌មាន AFP បានឲ្យដឹងថា ៖«យើងអាចបញ្ជាក់ថា ពុំមានគណៈប្រតិភូរដ្ឋាភិបាលអ៊ីស្រាអែល នឹងត្រូវបានអញ្ជើញឲ្យចូលរួមការតាំង ពិព័រណ៍ការពារជាតិ «DSEI UK 2025» នៅក្នុងខែកញ្ញាទេ។

ក្រុមហ៊ុនការពារជាតិអ៊ីស្រាអែល នឹងនៅតែត្រូវបានអនុញ្ញាតឱ្យចូលរួមក្នុងព្រឹត្តិការណ៍ពីរឆ្នាំម្តង។ ប៉ុន្តែអ៊ីស្រាអែល បានរិះគន់ការសម្រេចចិត្តនេះថា ជាការរើសអើង។

ក្នុងរយៈពេលប៉ុន្មានខែថ្មីៗនេះ រដ្ឋាភិបាលរបស់នាយករដ្ឋមន្ត្រី Keir Starmer បានព្យួរអាជ្ញាប័ណ្ណនាំចេញអាវុធទៅអ៊ីស្រាអែលសម្រាប់ប្រើប្រាស់នៅតំបន់ហ្កាហ្សា ផ្អាកកិច្ចចរចាពាណិជ្ជកម្មសេរីជាមួយអ៊ីស្រាអែល និងដាក់ទណ្ឌកម្មរដ្ឋមន្ត្រីអ៊ីស្រាអែលស្តាំនិយមពីររូប ក្នុងការប្រឆាំងជំទាស់នឹងការធ្វើសង្គ្រាមរបស់អ៊ីស្រាអែល នៅតំបន់ហ្កាហ្សា។

សេចក្តីថ្លែងការណ៍របស់ចក្រភពអង់គ្លេស បានបន្ថែមថា៖«ការសម្រេចចិត្តរបស់រដ្ឋាភិបាលអ៊ីស្រាអែលក្នុងការបង្កើនប្រតិបត្តិការយោធារបស់ខ្លួននៅក្នុងតំបន់ហ្កាហ្សា គឺខុស»។