ក្រុមមន្ត្រី នៅថ្ងៃសុក្រ (ទី២៩ ខែសីហា) នេះ បានប្រាប់ឲ្យដឹងថា ទូក ១គ្រឿងដែលដឹកជនអន្តោប្រវេសន៍ បានក្រឡាប់លិចនៅម្ដុំសមុទ្រនៃប្រទេសម៉ូរីតានី កាលពីដើមសប្តាហ៍នេះ ដោយបានសម្លាប់មនុស្សយ៉ាងហោចណាស់ ៤៩នាក់ និងប្រហែល ១០០នាក់កំពុងបាត់ខ្លួន។

មន្ត្រីឆ្មាំឆ្នេរជាន់ខ្ពស់ម្នាក់ បានប្រាប់បណ្ដាញសារព័ត៌មានថា៖ «អ្នកល្បាតរបស់យើងម្នាក់ អាចជួយសង្គ្រោះមនុស្សបាន ១៧នាក់។ មកទល់ពេលនេះ សាកសពចំនួន ៤៩នាក់ ត្រូវបានរកឃើញ និងកប់ ហើយការស្វែងរកកំពុងបន្តធ្វើ»។

មន្ត្រីរូបនោះបាននិយាយថា ឧបទ្ទវហេតុនេះបានកើតឡើងកាលពីយប់ថ្ងៃអង្គារ នៅពេលដែលជនអន្តោប្រវេសន៍ បានឃើញពន្លឺភ្លើងនៃទីក្រុងនៅម្ដុំតំបន់ឆ្នេរនៃប្រទេសម៉ូរីតានី ចម្ងាយប្រហែល ៨០គីឡូម៉ែត្រ នៅភាគខាងជើងនៃរដ្ឋធានី Nouakchott ហើយ «បាននាំគ្នាដើរទៅម្ខាងទូក ទើបបណ្តាលឲ្យវាផ្អៀង ហើយក្រឡាប់តែម្ដង»។

មន្ត្រីដដែលនោះបានឲ្យដឹងទៀតថា យោងតាមសេចក្តីថ្លែងការណ៍របស់ជនអន្តោប្រវេសន៍ បានឲ្យដឹងថា ទូកនេះបានចាកចេញពីប្រទេសហ្គំប៊ី មួយសប្តាហ៍មុននេះ ដោយមានមនុស្សប្រហែល ១៦០នាក់ជិះនៅលើនោះ ដែលក្នុងនោះមានទាំងជនជាតិសេណេហ្គាល់ និងហ្គំប៊ីផងដែរ។

កងអាវុធហត្ថមូលដ្ឋាន បានបញ្ជាក់ថា «សាកសពចំនួន ៤៩នាក់ ត្រូវបានរកឃើញរួចហើយ ហើយត្រូវបានបញ្ចុះដោយមានវត្តមានអាជ្ញាធរសុខាភិបាល និងរដ្ឋបាល»៕