បាត់ដំបង៖ ឯកឧត្តម ស្រេង វង្សហៀង ប្រធានក្រុមការងារគណបក្សប្រជាជនកម្ពុជាចុះជួយឃុំព្រះផុស លោកជំទាវ សុត សុវណ្ណដា និងឯកឧត្តម ហេង រ័ត្នសីមា អនុប្រធាន ព្រមទាំងក្រុមការងារ បានជួបសំណេះសំណាល និងឧបត្ថម្ភដល់ប្រជាពលរដ្ឋចំនួន ១៧២គ្រួសារ នៅព្រឹកថ្ងៃទី២២ ខែមករា ឆ្នាំ២០២២ នាស្នាក់ការក្រុមការងារចុះជួយឃុំព្រះផុស។

ថ្លែងក្នុងពិធីជួបសំណេះសំណាលនេះ ឯកឧត្តម ស្រេង វង្សហៀងបានថ្លែងថា ទោះបីអំណោយតិចតួចដែលបានផ្តល់ជូនពុកម៉ែ បងប្អូនប្រជាពលរដ្ឋទាំង ១៧២គ្រួសារនេះមិនអាចផ្គត់ផ្គង់ជីវភាពបានយូរអង្វែងក្តី ប៉ុន្តែជាការរួមចំណែកសម្រួលដល់ការលំបាកប្រចាំថ្ងៃមួយរយៈពេលដែរ ពិសេសក្នុងបរិបទកូវីដ-១៩ ។

ឯកឧត្តម បានថ្លែងបន្តថា ក្រោមទស្សនៈដឹកនាំប្រកបដោយយុទ្ធសាស្ត្រ របស់ប្រមុខរាជរដ្ឋាភិបាល សម្តេចតេជោ ហ៊ុន សែន ចាប់ពីដើមខែវិច្ឆិកាមក កម្ពុជាបានសម្រេចបើកដំណើរការប្រទេសពេញលេញលើគ្រប់វិស័យឡើងវិញ បន្ទាប់ពីស្ថានភាព នៃការឆ្លងរាលដាលជំងឺកូវីដ-១៩ ស្ថិតក្នុងកម្រិតមួយដែលអាចគ្រប់គ្រងបាន ពោលគឺករណីឆ្លងថ្មី និងអត្រាមរណភាព មានការថយចុះគួរឲ្យកត់សម្គាល់។

ឯកឧត្តម ស្រេង វង្សហៀងបានគូសបញ្ជាក់ថា ស្ថានភាពបែបនេះ ពិតជាមិនអាចកើតមាននោះឡើយ ប្រសិនបើរាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា មិនមានការសម្រេចចិត្តប្រកបដោយយុទ្ធសាស្ត្រ និងចក្ខុវិស័យវែងឆ្ងាយទេនោះ ពិសេសយុទ្ធនាការចាក់វ៉ាក់សាំងការពារកូវីដ-១៩ នៅទូទាំងប្រទេសដែលធ្វើឲ្យកម្ពុជា ស្ថិតក្នុងចំណោមប្រទេសដែលមានពលរដ្ឋ បានចាក់វ៉ាក់សាំងប្រឆាំងកូវីដ-១៩ ពេលគឺកម្ពុជាជាប់ចំណាត់ថ្នាក់លេខ១ នៅក្នុងតំបន់ និងស្ថិតនៅក្នុងលំដាប់លេខ៥ នៅលើពិភពលោក ។

ក្នុងឱកាសនោះឯកឧត្តមប្រធានក្រុមការងារគណបក្សប្រជាជនកម្ពុជាចុះជួយឃុំព្រះផុស ក៏បានស្នើដល់បងប្អូនប្រជាពលរដ្ឋ សូមបន្តអនុវត្តឲ្យបានខ្ជាប់ខ្ជួនតាមការណែនាំរបស់ក្រសួងសុខាភិបាល ដោយត្រូវលាងសម្អាតដៃឱ្យបានស្អាតជានិច្ច ពាក់ម៉ាសរាល់ពេលចេញក្រៅផ្ទះ រក្សាគម្លាតសុវត្ថិភាពគ្រប់ពេលវេលា បើទោះជាបានទទួលវ៉ាក់សាំងបង្ការកូវីដ-១៩ គ្រប់ដូសក្តី ។ សូមយកចិត្តទុកដាក់ថែរក្សាសុខភាព ជាពិសេសចំពោះលោកយាយ លោកតា ដែលមានវ័យជរា និងជំងឺប្រចាំកាយ ព្រោះអាចងាយនឹងប្រឈមជាមួយជំងឺផ្សេងៗ ពិសេសផ្តាសាយ នៅក្នុងអំឡុងពេលចុះត្រជាក់នេះ ។ ត្រូវយកចិត្តទុកដាក់ថែទាំកូនចៅ ពិសេសកុមារតូចៗ ឱ្យបានល្អ និងមានសុវត្ថិភាពពីការឆ្លង នៃជំងឺកូវីដ-១៩ ក៏ដូចជាជំងឺផ្សេងៗទៀត ។ ជាពិសេសសូមបន្តយកចិត្តទុកដាក់អប់រំណែនាំកូនចៅ ឱ្យចៀសឆ្ងាយពីគ្រឿងញៀន និងល្បែងស៊ីសងគ្រប់ប្រភេទ និងត្រូវផ្តោតលើការសិក្សា ទាំងនៅសាលារៀន និងពេលមកដល់ផ្ទះវិញ ។

ជាមួយគ្នានេះ ឯកឧត្តមប្រធានក្រុមការងារ បានណែនាំដល់អាជ្ញាធរពាក់ព័ន្ធសូមបន្តតាមដានរាល់ស្ថានភាពជីវភាព របស់បងប្អូនប្រជាពលរដ្ឋ ដោយកំណត់មុខសញ្ញាជនរងគ្រោះ និងជនងាយរងគ្រោះក្នុងបរិការណ៍ នៃវិបត្តិកូវីដ-១៩ អោយបាន ដើម្បីងាយស្រួលក្នុងការត្រៀមលក្ខណៈជួយអន្តរាគមន៍ បានទាន់ពេលវេលាដោយមិនត្រូវទុកឱ្យប្រជាពលរដ្ឋណាម្នាក់ ដែលមានបញ្ហា ឱ្យនៅរងាឯកា ដោយយើងមិនបានដឹងនោះទេ ជាពិសេសមិនត្រូវឲ្យមានការរើសអើងកើតឡើងឡើយ ។ សូមយកចិត្តទុកដាក់ថែរក្សាសន្តិសុខ សុវត្ថិភាព ជូនប្រជាពលរដ្ឋ ដោយអនុលោមទៅតាមគោលនយោបាយភូមិ ឃុំ មានសុវត្ថិភាព របស់ក្រសួងមហាផ្ទៃ៕ អត្ថបទ៖ នឿត សុភ័ក្ត្រ