នៅថ្ងៃសុក្រនេះ រុស្ស៊ីបានថ្កោលទោសការសម្រេចចិត្តរបស់អង់គ្លេស អាល្លឺម៉ង់ និងបារាំង ដើម្បីចាប់ផ្តើមដំណើរការដែលអាចឈានទៅរកការដាក់ទណ្ឌកម្មអង្គការសហប្រជាជាតិ(UN)ឡើងវិញ លើអ៊ីរ៉ង់ ជុំវិញកម្មវិធីនុយក្លេអ៊ែររបស់ពួកគេ ។

កាលពីថ្ងៃព្រហស្បតិ៍ម្សិលមិញ ប្រទេសអឺរ៉ុបទាំង ៣ បានដាក់ចេញ “យន្តការដាក់ទណ្ឌកម្មឡើងវិញ” ពាក់ព័ន្ធនឹងការចោទប្រកាន់ថា អ៊ីរ៉ង់បានបំពានកិច្ចព្រមព្រៀងឆ្នាំ ២០១៥ ដែលមានគោលដៅការពារពួកគេពីការផលិតអាវុធនុយក្លេអ៊ែរ ជាការដោះដូរនឹងការដកចេញទណ្ឌកម្មអន្តរជាតិ ។

ក្រសួងការបរទេសរុស្ស៊ី និយាយនៅក្នុងសេចក្តីថ្លែងការណ៍ដែលដាក់ការស្តីបន្ទោសសហរដ្ឋអាមេរិក និងអឺរ៉ុបសម្រាប់ការដួលរលំកិច្ចព្រមព្រៀងឆ្នាំ ២០១៥ថា ពួកយើងសូមធ្វើការថ្កោលទោសយ៉ាងខ្លាំងក្លាចំពោះវិធានការទាំងអស់នេះរបស់បណ្តាប្រទេសអឺរ៉ុប និងសូមធ្វើការអំពាវនាវឲ្យសហគមន៍អន្តរជាតិបដិសេធន៍ពួកគេ ។

រុស្ស៊ីបានចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្រ្តជាមួយអ៊ីរ៉ង់ក្នុងឆ្នាំនេះ និងបានថ្កោលទោសការទម្លាក់គ្រាប់បែកលើទីតាំងនុយក្លេអ៊ែរអ៊ីរ៉ង់ដោយអ៊ីស្រាអែល និងសហរដ្ឋអាមេរិក កាលពីខែមិថុនាកន្លងទៅ ។

អ៊ីរ៉ង់ច្រានចោលការចោទប្រកាន់របស់លោកខាងលិចថា ខ្លួនព្យាយាមស្វែងរកការផលិតអាវុធនុយក្លេអ៊ែរ ។

អ្នកនាំពាក្យក្រសួងការបរទេសរុស្ស៊ីអ្នកស្រី Maria Zakharova និយាយថា ការប៉ុនប៉ងណាមួយក្នុងការដាក់ទណ្ឌកម្មឡើងវិញលើទីក្រុងតេអេរ៉ង់ បានក្លាយជាកក្តាអស្ថិរភាពដ៏ធ្ងន់ធ្ងរមួយដែលនាំឲ្យអន្តរាយដល់ដំណោះស្រាយចរចា ។

អ្នកស្រីបន្តថា វាសំខាន់ខ្លាំងណាស់ ក្នុងការការពារការកើនឡើងភាពតានតឹងថ្មីលើកម្មវិធីនុយក្លេអ៊ែរអ៊ីរ៉ង់ដែលនាំឲ្យមានផលវិបាកធ្ងន់ធ្ងរបំផុត ៕