យោធាអ៊ីស្រាអែល និយាយថា ខ្លួនបានចាប់ផ្តើមដំណាក់កាលបឋមនៃការវាយប្រហារលើទីក្រុងហ្កាហ្សា ខណៈពួកគេប្រកាសមជ្ឈមណ្ឌលទីក្រុងធំបំផុតនៅក្នុងដែនដីឡោមព័ន្ធមួយនេះថាជា “តំបន់ប្រយុទ្ធ” ហើយនិងប្រកាសផ្អាកការបញ្ឈប់ការប្រយុទ្ធនៅទីនោះ ដើម្បីអនុញ្ញាតឲ្យជំនួយមនុស្សធម៌ចូលនោះ ។

លោក Avichay Adraee គឺជាអ្នកនាំពាក្យយោធាអ៊ីស្រាអែល និយាយនៅក្នុងសារបង្ហោះលើបណ្តាញព័ត៌មានសង្គម Xនាថ្ងៃសុក្រនេះថា ពួកយើងលែងរង់ចាំទៀតហើយ ។ ពួកយើងបានចាប់ផ្តើមប្រតិបត្តិការបឋមនៃការវាយប្រហារទីក្រុងហ្កាហ្សា ។ លោកថា បច្ចុប្បន្នពួកយើងកំពុងប្រតិបត្តិការកម្លាំងដ៏ខ្លាំងអស្ចារ្យនៅតំបន់ជាយក្រុងទីក្រុងហ្កាហ្សា ។

ការប្រកាសបែបនេះ បានកើតមានឡើង ពេលដែលយោធាអ៊ីស្រាអែលបញ្ជាក់ថា ពួកគេបានព្យួរចោល “ការផ្អាកតាក់ទិក”នៅក្នុងការវាយប្រហាររបស់ខ្លួននៅទីក្រុងនៅតំបន់ភាគខាងជើងមួយនេះ ដែលកាលពីមុន អនុញ្ញាតឲ្យមានប្រតិបត្តិការមនុស្សធម៌តាមដែនកំណត់នៅទីនោះ ។

យោធាអ៊ីស្រាអែលនិយាយក្នុងសារបង្ហោះលើបណ្តាញព័ត៌មាន Xថា ចាប់ពីវេលាម៉ោង ១០ព្រឹក ម៉ោងក្នុងស្រុកថ្ងៃនេះ បទឈប់បាញ់ក្នុងស្រុកតាក់ទិករបស់សកម្មភាពយោធា លែងអនុវត្តទៀតហើយនៅតំបន់ទីក្រុងហ្កាហ្សា ដែលវានឹងក្លាយជាតំបន់ប្រយុទ្ធដ៏គ្រោះថ្នាក់ ។

គួរឲ្យដឹងថា កងកម្លាំងអ៊ីស្រាអែល បានចាប់ផ្តើមទម្លាក់គ្រាប់បែកលើទីក្រុងហ្កាហ្សា ចាប់តាំងពីដើមខែសីហាមកម្ល៉េះ ពេលដែលយោធាត្រៀមខ្លួនសម្រាប់ការវាយប្រហារទ្រង់ទ្រាយធំ ដើម្បីដណ្តើមគ្រប់គ្រងមជ្ឈមណ្ឌលទីក្រុងធំបំផុតនៅតំបន់ហ្កាហ្សាមួយនេះ គឺជាប្រតិបត្តិការមួយដែលអាចជម្លៀសទាំងបង្ខំជនប៉ាឡេស្ទីន ១លាននាក់ ទៅកាន់តំបន់ប្រមូលផ្តុំ ស្ថិតនៅភាគខាងត្បូងហ្កាហ្សា ។

ក្រសួងសុខាភិបាលប៉ាឡេស្ទីន និយាយប្រាប់កាសែត Al Jazeera ថា ការទម្លាក់គ្រាប់បែកឥតឈប់ឈរពីលើអាកាស និងតាមជើងគោក បានបង្ខំឲ្យអ្នកស្រុករត់ភៀសខ្លួនទៅកាន់តំបន់ភាគខាងលិចទីក្រុង ៕